Ittri | 30 ta’ Marzu 2008 Nr 74

Gerada u l-Parlament Malti

Minn Edward Torpiano,
Floriana

Nixtieq inwieġeb ittra li ġġib l-isem ‘Torpiano u l-Parlament’ miktuba mill-korrispondent Mario Gerada. F’din l-imsemmija ittra qal ‘Alfred Sant dejjem tela’ fil-Parlament, anke meta ma kienx il-Kap tal-Partit Laburista mhux bħal Torpiano li qatt ma riduh li jkun fil-Parlament’.
Ngħid li mhux veru li Alfred Sant, bħala kandidat, dejjem kien elett fil-Parlament Malti anke meta ma kienx kap tal-Partit Laburista tant li, fl-Elezzjoni Ġenerali tat-22 ta’ Frar, 1992 Alfred Sant kien kiseb biss 14-il vot fl-ewwel għadd tal-voti validi fl-Ewwel Distrett Elettorali.
Fl-isfond ta’ dan kollu, wieħed jista’ jikkonkludi li dan l-korrispondent ma jaf xejn dwar statistika elettorali uffiċjali u huwa tajjeb biss biex ipeċlaq.
Bl-istess argument li s’issa, skond ċertu Gerada, lili ma ridunix fil-Parlament Malti, nistgħu ngħidu li Alfred Sant kien tassew serial loser (dejjem tellief) għax ma riduhx bħala Prim Minsitru ta’ Malta ħlief fl-Elezzjoni Ġenerali tas-26 ta’ Ottubru, 1996 fejn, wara 22 xahar, fit-3 ta’ Awissu, 1998, xolja l-Parlament wara li waqt konferenza stampa li saret fix-xatt tal-Birgu kien mar jgħajjar lil Dom Mintoff “traditur”.