Aħbarijiet | 30 ta’ Marzu 2008 Nr 74

Il-MEPA teħtieg riforma

Minn David Pisani,
Tezorier/Attivitajiet u Distribuzzjoni

Żminijietna - Leħen ix-Xellug, laqgħet id-deċiżjoni tal-Gvern biex jiffriża d-deċiżjonijiet tal-MEPA biex din tiġi riformata, għalkemm dejjem emminna li din id-deċiżjoni missha ilha li ttieħdet żmien ilu wara deċiżjonijiet inaċċettabbli għal żvilupp bħal dak tas-supermarket f’Ħal-Safi; il-pompa tal-petrol f’Ta’ Buqana u l-outline development permit għal nightclub fil-Mistra.
Qed nappellaw lill-Gvern biex jimplementa ruling biex, ħlief għal żvilupp soċjali b’importanza urġenti u nazzjonali, kull żvilupp li jaqa’ barra l-konfini ta’ żvilupp u/jew li jmur kontra l-policies tal-MEPA jiġi rifjutat minnufih.
Fost l-iżvilupp li għandu jiġi rrifjutat hemm il-proposta ta’ yacht marina u villaġġ turistiku ġewwa Ħondoq ir-Rummien; l-iżvilupp ta’ aparthotel fuq art verġni fil-Mellieħa, l-iżvilupp ta’ vilel u appartamenti lussużi f’Ta’ Ċenċ u l-iżvilupp ta’ nightclub fil-Mistra. Proposti għall-iżvilupp ta’ lukandi għandhom jiġu ikkunsidrati biss jekk jinvolvi siti li diġà ntużaw għall-żvilupp turistiku, bħas-sit tal-Jerma Palace u m’għandhomx jieħdu iktar art verġni.
Żminijietna temmen ukoll li l-MEPA tirrikjedi bidliet radikali fil-mod kif jittieħdu d-deċiżjonijiet. Iċ-ċittadin komuni għandu jkollu s-saħħa kontra żviluppaturi li għadhom igawdi minn poter sproporzjonat irrispettivament mill-bidliet riċenti fil-liġi dwar xogħol ta’ kostruzzjoni.
Tinħtieġ parteċipazzjoni akbar mis-soċjetà ċivili fil-proċess tat-teħid tad-deċiżjonijiet u fil-proċess ta’ l-infurzar. B’hekk jiġu rappreżentati setturi bħal dawk soċjali, ambjentali, ekonomiċi, ta’ l-ippjanar, agrikoli, lokali, governattivi u oħrajn. Fl-aħħar mill-aħħar nisħqu li l-ebda Gvern m’għandu jaħsel idejh mir-responsabilitajiet soċjali u ambjentali.