Aħbarijiet | 09 ta’ Marzu 2008 Nr 71

Ix-xnigħat ta’ l-elezzjoni

Julia Farrugia
jfarrugia@mediatoday.com.mt

Matul il-ġurnata tal-bieraħ ma naqsux xnigħat differenti b’rabta ma’ l-elezzjoni ġenerali.
Waħda minn dawn ix-xnigħat kienet li fid-Dar Ċentrali tal-Partit Nazzjonalista rċevew madwar 1,000 dokument tal-vot ta’ kaċċaturi li bi protesta ma marrux jivvutaw. Gordon Pisani, Direttur Informazzjoni tal-PN, qal li ma kienx jaf b’din il-ħaġa.
Xniegħa oħra li bdiet mill-Ġimgħa kienet li s-Segretarju Ġenerali tal-Partit Laburista Jason Micallef u d-Deputat Mexxej Laburista Michael Falzon spiċċaw fl-idejn.
Il-verżjonijiet minn ħin għall-ieħor bdew jinbidlu b’telefonati anke jissuġġerixxu li s-Segretarju Ġenerali tal-MLP qala’ daqqa ta’ ponn.
Ikkuntattjat minn din il-gazzetta Jason Micallef ċaħad kompletament din l-aħbar u b’daħka qal li “Michael Falzon qiegħed ħdejja. Din gidba sfaċċata!”
Micallef sostna li mill-Ġimgħa sas-Sibt sema’ numru ta’ verżjonijiet differenti u li turi kemm din kienet gidba faħxija.
U biex il-bubun ikompli jagħqad fil-Kredu daħal ukoll il-Ministru Austin Gatt. Xnigħat oħra kienu jgħidu li Gatt spiċċa l-vittma f’daqqa ta’ ponn li allegatament ingħatatlu mingħand pampalun Belti li hu eks sportiv. Aħbar li kienet miċħuda mis-Segretarjat Privat tal-Ministru.