Aħbarijiet | 02 ta’ Marzu 2008 Nr 70

Il-bombi tal-kampanja

Kurt Sansone

1. Saħħa bil-ħlas
2. Permess illegali
3. Diskoteka fil-Mistra
4. Klassi repeaters
5. Sahra siegħa b’siegħa
6. Jiftaħ il-pakkett
7. Resits tas-SEC
8. Midjun mal-Gvern
9. Junior Lyceums
10. Renè Rossignaud
11. Michael Woods

Il-kampanja elettorali tal-Partit Laburista ġralha bħat-tieġ ta’ Kana fejn l-inbid it-tajjeb servewh fl-aħħar.
B’kampanja xejn spettakolari l-Partit Laburista ħalla għal ħafna żmien l-inizjattiva f’idejn il-Partit Nazzjonalista li rnexxielu jiddetta l-aġenda fl-ewwel tliet ġimgħat tal-kampanja elettorali.
Imma nhar l-Erbgħa li għadda l-folja nqalbet. Id-dokument ta’ l-2004 li żvela Alfred Sant dwar il-finanzjament tas-servizz tas-saħħa u li implika wkoll lill-Kabinett dawwar il-kanuni fuq l-avversarji politiċi, partikolarment fuq Lawrence Gonzi. Il-PN kellu jbiddel l-istrateġija tiegħu u saħansitra organizza żewġ konferenzi stampa biex jirribatti l-kritika ta’ Alfred Sant.
Imbagħad inqas minn tlett ijiem wara l-MLP faqqa’ bomba oħra li implikat l-iktar kandidat Nazzjonalista bi kredenzjali ambjentali, fi żvilupp grottesk fil-Mistra.
Iżda dawn il-bombi ma kinux l-uniċi li splodew fil-kampanja elettorali. Kien hemm numru ta’ inċidenti jew argumenti li tefgħu lil naħa jew oħra f’kantuniera.
L-erba’ partiti politiċi spiċċaw vittmi, b’xi mod jew ieħor, tal-11-il bomba li splodew tul il-kampanja. Iżda bħalma jiġri f’kull gwerra, ħafna drabi l-ikbar vittma tkun il-verità.