Aħbarijiet | 24 ta’ Frar 2008 Nr 69

L-MLP jikkopja lill-PN u joħroġ bis-sassla

Julia Farrugia
jfarrugia@mediatoday.com.mt
Il-Partit Laburista rikeb fuq il-mewġa tal-PN u fi ftit jiem iddeċieda li jikkupjah u jagħmel ġbir ta’ fondi bħalu.
Nhar il-Ħadd li għadda din il-gazzetta rrappurtat kif sal-Ġimgħa 15 ta’ Frar tal-MLP kienu għadhom bil-ħsieb li ma jagħmlux ġbir ta’ fondi.
Iżda f’daqqa waħda d-deċiżjoni ddawret u l-MLP ħabbar li llum mill-10 ta’ filgħodu sal-11 ta’ filgħaxija sa jagħmel dik li qed isejjaħ “inizjattiva ġbir ta’ fondi.”
Il-ħsieb biss li l-PN kien se jagħmel ġabra eventwalment ġab pressjoni fuq il-Partit Laburista.
Il-biża’ kienet li l-ġabra tal-Partit Nazzjonalista se tkun wirja ta’ saħħa li b’xi mod setgħet twaqqa’ l-moral tal-partitarji Laburisti.
F’mument delikat bħal dan ta’ ġimagħtejn qabel elezzjoni ġenerali l-moral tal-partitarji importanti li jibqa’ għoli u r-raġunament tal-MLP kien li la tal-PN se jagħmlu ġabra anke huma setgħu jagħmlu waħda.
Sorsi qrib il-Mile End ikkonfermaw ma’ Illum li uffiċjali tal-Partit Laburista taw il-parir li jsir ġbir ta’ fondi biex tkompli tittella’ l-aspettattiva tal-partitarji.
“Bħalissa kull donazzjoni tgħodd, l-aktar meta wieħed iqis l-ispejjeż li ġġib magħha kampanja elettorali,” sostna uffiċjal minnhom.
Loġistikament il-Partit Laburista se jkun diġà armat fuq il-Fosos minħabba l-mass meeting li se jsir illum fit-3.30pm u għalhekk il-Partit ma kienx se jidħol f’aktar problemi ħlief li jsejjaħ numru ta’ artisti, fosthom kantanti u żeffiena, biex jgħinuhom jilħqu l-mira tagħhom.