Aħbarijiet | 24 ta’ Frar 2008 Nr 69

AD tiftaħ il-kanuni fuq il-partiti l-kbar dwar il-kera

Sabrina Agius
sagius@mediatoday.com.mt

Bi kritika għaż-żewġ partiti l-kbar, il-kap ta’ l-Alternattiva Demokratika Harry Vassallo lbieraħ sostna li l-AD biss tista’ tagħmel xi ħaġa dwar il-liġijiet tal-kera.
B’referenza għall- manifest tal-MLP, Vassallo qal li “il-Partit Laburista qed jipproponi l-white paper li baqa’ ma ippubblikax il-Partit Nazzjonalist.”
Kien kumment sarkastiku għax fil-manifest Laburista m’hemm xejn imniżżel fuq is-suġġett.
Mill-banda l-oħra, il-PN kulma daħħal fil-manifest kienu tliet paragrafi xotti xotti.
“L-ewwel waħda twiegħed riforma mingħajr ma tgħid din ir-riforma x’inhi. It-tieni paragrafu hu daqqa ta’ ħarta għal min hu sid. Min idaħħal Lm20 mill-kera f’sena mhux se jħallas taxxa fuqha. Prosit għall-PN. L-aħħar daqqa ta’ ħarta hi li l-Gvern qed jipproponi biex iħallas ix-xogħlijiet li jsiru f’dawn id-djar,” sostna Vassallo.
Il-Kap ta’ AD baqa’ jsostni li “Alternattiva Demokratika biss f’koalizzjoni tista’ tagħmel xi ħaga għal dawk in-nies li ilhom 36 sena jistennew. Aħna qed nipproponu li minnufih jintemm il-wirt tal-kirjiet.”
Vassallo semma wkoll li jaf b’ħafna każijiet ta’ nies li jgħinu lil uliedhom iħallsu l-loan minkejja li għandhom proprjetà tagħhom stess imma li ma jistgħux imissuha.