Aħbarijiet | 17 ta’ Frar 2008 Nr 68

Endemol: ‘No Deal għal Gonzi’

Julia Farrugia

Il-kumpanija internazzjonali Endemol qatt ma tat permess lill-Where’s Everybody? (WE) biex jużaw il-format tal-programm ‘Deal or No Deal’ għal waqt attività politika mal-Prim Ministru Lawrence Gonzi.
Dan ikkonfermah Peter Krenn, il-persuna responsabbli mill-Corporate Communications ta’ l-Endemol.
Krenn sostna li “bħala regola ġenerali l-Endemol ma tiħux pożizzjonijiet politiċi. Aħna ma tajniex l-approvazzjoni biex il-format tagħna ta’ ‘Deal or No Deal’ jintuża f’attività politika,” qal Krenn lil Illum.

Il-ġimgħa li għaddiet il-preżentatur Pablo Micallef, ta’ ‘Deal or No Deal’, ħa sehem f’attività politika tal-PN billi għamel numru ta’ mistoqsijiet lill-Prim Ministru. Waqt din l-attività Micallef kuldarba li rċieva tweġiba ta’ Lawrence Gonzi uża l-istess prinċipju tal-programm u staqsieh “Deal or No Deal?”.
Il-Kap Nazzjonalista kompla miegħu billi ħa ‘id-deals’ li sarulu.
Għal dawn l-aħħar jiem il-media tal-Partit Laburista xandret siltiet minn din l-attività politika u waqqgħet għaċ-ċajt il-fatt li l-Prim Ministru spiċċa jieħu d-deals.
Fi ftit sigħat fuq is-sit popolari ta’ l-internet youtube.com ittellgħu wkoll il-clips tal-laqgħa taħt it-tinda li kellu Gonzi fejn juruh jieħu d-deals li offrielu Micallef.