Aħbarijiet | 17 ta’ Frar 2008 Nr 68

Nixtieq kampanja tajba li tgħaddi malajr

Sue Vassallo titkellem dwar l-esperjenza tagħha f’kampanja elettorali ta’ partit żgħir li qed jaspira biex ibiddel is-sitwazzjoni politika

X’inhu rwol tiegħek f’din il-kampanja elettorali?
Nipprova nkun akkoljenti meta n-nies iċemplu d-dar u meta jiltaqgħu miegħi fit-triq. Madankollu, minħabba li spiss jew kważi dejjem ikolli t-tfal miegħi, mhux dejjem possibbli ndum ħafna nitkellem magħhom! Is-soltu jekk għandhom xi mistoqsija li ma nistax nwieġeb ngħidilhom iċemplu l-uffiċċju tal-AD.

Taffettwak kampanja elettorali?
Iva. Fejn is-soltu l-ħin ta’ Harry magħna bħala familja diġà ma jkunx wisq, matul il-kampanja iżjed u iżjed jonqos. Ma narahx u ovvjament it-tfal ma jarawhx ukoll. Hemm l-eċċitament, imma dejjem nixtieq li tkun kampanja tajba u li tgħaddi malajr.

X’tibdil rajt f’Harry tul din il-kampanja?
Kien kuntent li fl-aħħar kien hemm deċiżjoni dwar id-data ta’ l-elezzjoni imma mill-bqija rajtu iżjed imħabbat peress li qed jagħmel il-home visits kuljum u jidħol iżjed tard.  Naħseb ma tantx qed jiekol biżżejjed jew jekk qed jiekol xi ħaġa naħseb ma tantx hu sustanzjuż daqslikieku qed jiekol magħna d-dar. Nipprova ngħidlu x’sajjart u ġieli jsib il-ħin biex fis-1pm jgħaddi d-dar.
Il-komunikazzjoni bejnietkom dominata biss mill-politika?
Le, ma tkunx fuq politika biss. Insib il-ħin għal xi ċajta tajba jew aħbar fuq it-tfal, speċjalment fuq x’jagħmlu matul il-ġurnata.

Għalfejn in-nies għandhom jagħżlu lil Harry?
Harry sinċier f’dak li jemmen fuq l-ambjent u verament jixtieq ikun hemm bidla ħalli l-partiti jibdew jaħdmu flimkien għall-aħjar futur ta’ Malta u Għawdex u tal-Maltin u l-Għawdxin kollha.

X’inhi l-aktar kwistjoni li n-nies għandhom jiftħu għajnejhom dwarha f’din l-elezzjoni?
Li rridu naħdmu u ngħixu flimkien anki jekk politikament ma tantx naqblu. Fl-aħħar mill-aħħar aħna Maltin u kulħadd iħobb il-gżejjer tagħna. Għandna nkunu kburin li ngħixu hawnhekk anki jekk mhix sitwazzjoni perfetta. Hawnhekk darna.

Iddiskutejtu l-possibiltà ta’ telfa elettorali?
Iva. Dejjem trid ikollok saqajk ma’ l-art u tkun preparata għal kull ħaġa, anki f’elezzjoni ġenerali.