Aħbarijiet | 17 ta’ Frar 2008 Nr 68

353 proposta mill-PN

F’konferenza ġenerali straordinarja lbieraħ il-PN approva it-353 proposta li se jiffurmaw il-programm ta’ ħidma għas-snin li ġejjin. Fost il-proposti hemm uħud intiżi biex jilqgħu għat-theddida li għandu l-PN mill-partiti ż-żgħar.

Dawn huma wħud mill-proposti:

Wirt: Titneħħa t-taxxa fuq il-wirt anki meta l-proprjetà tgħaddi mill-ġenituri għall-ulied

Kaċċa u nsib: Jiġu ipprattikati b’konformità mar-regolamenti ta’ l-UE kif interpretati mill-Qorti Ewropea

Għawdex: Jiġġenera l-enerġija kollha tiegħu bl-użu ta’ sorsi alternattivi. Ikun żviluppat l-ewwel faċilità ta’ open air studio għall-produzzjoni tal-films
Taxxi: Titneħħa t-taxxa fuq it-tluq bl-ajru. Titneħħa l-levy fuq il-credit cards. Titneħħa wkoll il-liċenzja tat-televixin. Jitwessgħu l-faxex tat-taxxi biex l-ogħla rata tkun ta’ 25% ħlief għal dawk li jaqilgħu €60,000.

Kriminalità: Jiġu introdotti tags elettroniċi għall-persuni li jkunu akkużati b’reati serji li jinħelsu bi pleġġ sakemm jgħaddu ġuri. Jitwaqqaf reġistru bl-ismijiet ta’ persuni li jkunu nstabu ħatja ta’ reati sesswali serji li jkun aċċessibbli għall-forzi ta’ l-ordni u istituzzjonijiet oħra.

Trasparenza: Ħatriet f’bordijiet tal-Gvern isiru wara sejħa pubblika għall-applikazzjoni. Issir liġi biex tipproteġi l-Whistleblowers ħalli tiżdied it-trasparenza u l-kontabbiltà fl-amministrazzjoni pubblika.