Emmanuel Micallef | 17 ta’ Frar 2008 Nr 68

Riħa tintenn tad-“W...C...”

Issa li kull partit approva l-manifest elettorali tiegħu mill-istrutturi interni tal-Partit m’hemmx aktar x’jagħmlu ħlief fil-ftit ġimgħat li baqa’ għall-elezzjoni ġenerali jwasslu l-proposti tagħhom lill-elettorat.
Il-manifest elettorali mhux xi ktieb biex il-partit joqgħod jiftaħar b’rixu. Imma huwa pjan jew programm ta’ ħidma li qed jitressaq għall-għażla tal-poplu li jrid jiddeċiedi l-futur tiegħu. Huwa d-dokument li l-partit, permezz tiegħu juri l-aġenda (mhux aktar moħbija) ta’ kif jista’ jaffettwa l-ħajja ta’ kuljum taċ-ċittadin kemm-il darba jitla’ fil-Gvern.
Minn issa ’l quddiem fuq dan għandhom jikkonċentraw il-partiti fil-kampanja elettorali tagħhom. Fl-imgħoddi kien jiġri li ħafna mill-programmi elettorali kienu jikkonsistu f’retorika li ddoqq tajjeb fil-widnejn ta’ l-elettorat iżda mingħajr dettalji jekk mhux ukoll f’ċerti waqtiet b’kitba ambigwa li tista’ tingħata iktar minn interpretazzjoni waħda. Biex imbagħad matul il-leġislatura wieħed ikun jista’ jiżfen skond id-diska!
Illum iċ-ċittadin jippretendi ferm iktar minn hekk. Mhux biżżejjed li l-manifest elettorali jenfasizza b’certa saħħa l-prinċipji u l-viżjonijiet tal-partit. L-iktar ħaġa li jfittex l-elettorat hija l-proposti konkreti li huma fattibbli u li japplikaw fid-diversi oqsma tal-ħajja taċ-ċittadin. Jekk il-manifesti elettorali qed jiġu ippubblikati bħala formalità f’kampanja elettorali, allura mhux se jilħqu l-għan tagħhom. Iktar u iktar din id-darba fejn l-elettorat se jibbaża l-għazla tiegħu fuq il-proposti li se jressqu l-partiti.
Mill-proposti li tħabbru s’issa mill-partiti diġa’ bdejna nitfixklu f’saqajn xulxin. Għadna ma smajniex bi proposta ċara li ma fiha l-ebda dubju dwar kif tista’ titħaddem, kemm se tiġi tiswa, x’impatt se tħalli u jekk għandniex verament ħtieġa tagħha. Kull proposta li ssemmiet s’issa ġabet magħha iktar mistoqsijiet milli tweġibiet jew ħolqot kontroversja sħiħa.
Bir-riżultat li l-elettorat iktar qed iħabbel rasu dwar x’mhux jintqal milli f’dak li qed jixxandar jew jitħabbar. Mhux biss il-proposti fihom xamma ta’ ingann iżda bosta esponenti tal-partiti li jitħajru jitkellmu dwar il-proposti mressqa mill-partit tagħhom stess qed ikomplu jħabblu l-kobba.
Niskanta kif ċerti kandidati jew uffiċjali tal-partiti jersqu quddiem il-pubbliku biex suppost jipperswaduh u minflok jispiċċaw joħorġu ta’ mażetta u jinqabdu li ma jkunux ippreparati. Bla ma jafu jkunu qed jagħmlu disservizz lill-partit tagħhom stess u flok iżidu fl-appoġġ jew almenu s-simpatija jkunu fil-fatt qegħdin ibiegħdu lill-elettorat milli jagħti kas ta’ dak li jkunu qegħdin jgħidu. Mhux qed nirreferi għal dawk li jbatu biex jikkomunikaw jew li m’għandhomx id-don ta’ l-oratorija effettiva. Qed nirreferi għal dawk li għandhom parola facile iżda meta jiġu għas-sustanza jispiċċaw qishom il-bramel vojta li jagħmlu biss l-istorbju!
Sa ġimgħa ilu kont qed naħseb li matul din il-kampanja kien se jirnexxielna noħolqu dibattitu serju dwar il-proposti u b’hekk l-elettorat kien se jkollu għodda tajba biex jagħmel l-aħjar għażla. Iżda matul il-ġimgħa li għaddiet bħal donnu erġajna waqajna fin-nassa li d-diskussjoni politika nirriduċuha għal waħda ċarlatana fejn iktar intlifna nitgħajru bejnietna milli nispjegaw sew l-ideat politiċi u kif dawn se jissarrfu fil-prattika. L-aħbarijiet fuq il-mezzi tax-xandir iktar qed jagħtu importanza dwar kemm il-mexxejja qed jaħarbu lill-ġurnalisti jew kemm-il darba qed jaħarbu l-mistoqsijiet. Mill-banda l-oħra bosta ġurnalisti jidhru li mhux huma qed jippreparaw il-mistoqsijiet, iżda l-istrateġisti tal-partit li huma s-sidien tal-istazzjon jew tal-ġurnal tagħhom, li qed jużawhom biex jakkommodaw l-istrateġija tagħhom. Minn dak li rajt matul il-ġimgħa li għaddiet wasalt għall-konklużjoni li l-partiti iktar moħħhom kif jibnu kampanja negattiva biex “tkisser lin-naħa l-oħra” milli biex tippromwovi l-pożittiv tal-partit tagħhom stess. Qed jagħmlu dan mhux il-partiti l-kbar biss iżda issa daħlu fiċ-ċirku l-partiti l-oħra wkoll.
Anke d-dibattiti fuq it-televizjoni qed ikunu neqsin mir-rispett lejn l-intelliġenza taċ-ċittadin u kultant qed jaqgħu f’assurdità ta’ repetizzjonijiet li ilna nisimgħu snin sħaħ mingħajr sens ta’ dibattitu profond u formattiv.
Bħal dak li qallu min ikun isegwi ma jafx jgħodd mill-wieħed sa l-għaxra! Mhux ta’ b’xejn li ħafna min-nies fit-triq iktar għoxew jitħattu dwar kif Mintoff irnexxielu jieħu rikba minn fuq il-PBS mid-dar tiegħu sa l-Evans Building milli dwar dak li qalu l-mexxejja tal-partiti waqt l-attivitajiet politiċi.
Oħrajn iktar kien moħħhom f’dawk iċ-ċittadini li għal xi raġuni jew oħra għazlu li joħorġu fil-pubbliku biex juru li ddeċidew ibiddlu l-alleanza tagħhom. Mhux qed ngħid li dawn ma jħallux effett għax kif jgħidu l-qasba ma ċċaqċaqx għalxejn! Iżda jien, u bħali hawn ħafna, iktar jinteressani x’se jiġri fil-qasam tax-xogħol, fl-edukazzjoni u fl-ambjent u x’bidla għandu bżonn pajjiżna milli x’iddeċidew li jagħmlu Said, Rossignaud, Woods u Cacopardo! Naturalment dawn bagħtu messaġġ u l-elettorat huwa intelliġenti biżżejjed biex jiżen u jifli l-imġiba tagħhom u jekk dawn humiex il-ftit minn ħafna jew humiex biss il-waħdiet. Żgur li x’qed joffru l-partiti huwa iktar importanti u ta’ priorità u l-kampanja elettorali m’għandhiex tieħu s-sura ta’ diskursata bejn erbat iħbieb waqt xarba fil-każin.
Wieħed jittama li fit-tliet ġimgħat li baqa’ ir-rankatura elettorali tieħu forma ta’ ġlieda bejn l-ideat, ta’ evalwazzjoni ta’ proposti konkreti u ta’ tollerranza ta’ l-opinjonijiet diversi. Wieħed jistenna li matul dan iz-zmien għandha tiżdied (u mhux tonqos) l-istima ta’ l-elettorat lejn il-politiċi li qed joffru s-servizzi tagħhom għal ġid tal-pajjiż. Dan ir-rispett jinkiseb kemm-il darba l-partiti jifhmu li l-elettorat mhuwiex in-ngħaġ ta’ Bendu.
Tkun ħasra kbira jekk id-deċiżjoni lil min se nivvotaw tkun ibbażata biss fuq x’riħa tinten kien hemm fiċ-ċaqliq ta’ Woods u Cacopardo... u oħrajn bħalhom mingħajr ma nagħtu widen ta’ x’hemm lest għalina... fil-Bidu Gdid meta Flimkien Kollox Possibli!