Aħbarijiet | 10 ta’ Frar 2008 Nr 67

L-ebda sorpriża fil-kandidati tal-MLP

Il-Konferenza Ġenerali tal-Partit Laburista nhar il-Ġimgħa approvat is-70 kandidat tal-MLP għall-elezzjoni ġenerali mingħajr kandidati sorpriża fil-lista li tinkludi wkoll seba’ nisa.
Minkejja spekulazzjoni qawwija li isem Marlene Mizzi seta’ kien fuq il-lista, l-eks chairman tas-Sea Malta mhix se tkun kandidata mal-MLP.
Madankollu, bħalma hi l-użanza kulmeta toqrob elezzjoni, il-konferenza ġenerali nhar il-Ħamis li għadda tat lit-tmexxija tal-partit id-dritt li tinnomina kandidati fl-aħħar minuta.
Alfred Sant se jkun qed jikkontesta fuq l-istess żewġ żewġ distretti bħas-snin l-imgħoddija, jiġifieri l-Ewwel u t-Tmien Distrett.
Din se tkun l-ewwel darba mill-1996 li mhux se jkun hemm konfront dirett bejn iż-żewġ mexxejja tal-partiti l-kbar. Sa l-2003 il-konfront klassiku kien ikun fuq Birkirkara fejn Eddie Fenech Adami u Alfred Sant.
Id-Deputat Mexxej Michael Falzon se jikkontesta fuq it-Tieni u l-10 Distrett filwaqt li d-Deputat Mexxej l-ieħor, Charles Mangion se joħroġ fuq ir-Raba’ u s-Sitt Distrett.
Fuq it-tielet distrett se jkun hemm l-ikbar kontestazzjoni interna għax se joħorġu 11-il kandidat. Min-naħa l-oħra, fil-11-il Distrett l-MLP se jkollu biss ħames kandidati.
Il-veteran Joe Debono Grech għal darb’oħra se jikkontesta fuq l-Ewwel u t-Tmien Distrett filwaqt li isem l-attur Narcy Calamatta jerġa’ jitfaċċa fuq
il-lista tad-Disa’ Distrett.
Fuq Għawdex l-MLP se jkollu sitt kandidati filwaqt li l-kirurgu Anthony Zammit li opera fuq Alfred Sant, se jikkontesta fuq il-Ħames u s-Seba’ Distrett.
Fost il-kandidatura tal-MLP hemm ukoll numru ta’ uċuh ġodda ewlenin fosthom bin l-eks ministru Laburista Joe Micallef Stafrace, Simon, u bin l-eks deputat Laburista, illum maġistrat, Philip Sciberras, Alex. Simon Micallef Stafrace se jikkontesta fuq l-Ewwel Distrett filwaqt li Alex Sciberras se joħroġ fuq id-Disa’ Distrett li jinkludi l-Imsida fejn hu sindku.