Wara li fl-aħħar il-Prim Ministru ħabbar id-data ta’ l-Elezzjoni Ġenerali għal nhar is-Sibt 8 ta’ Marzu, iktar qiegħda tiżdied il-ħeġġa u l-entużjażmu biex jasal dak il-mument li naraw lill-Partit Laburista jmexxi lil pajjiżna.
Nhar it-8 ta’ Marzu l-poplu Malti kollu għandu d-dritt li b’mod demokratiku jtella’ Gvern li se jmexxi lil pajjiżna għal dawn il-ħames snin li ġejjin. Gvern li għandu jħares il-poplu kollu b’mod ugwali billi joffri s-serħan tal-moħħ, billi jiżgura li kullħadd ikollu moħħu mistrieħ li għandu post tax-xogħol, li kull ċittadin iħossu mħares minn dak kollu li jagħmel u li jkollu dinjità mistħoqqha fil-ħajja ta’ kuljum.
Il-Maltin u l-Għawdxin kollha qed jagħrfu li għal dan kollu hemm partit wieħed li jista’ joffrilhom ilkoll f’daqqa.
Ix-xogħol, il-ħarsien u d-dinjità huma tliet fatturi li l-Partit Laburista ilu jisħaq fuqhom għal dawn l-aħħar snin. Wasal iż-żmien li pajjiżna jkollu Gvern li jixraqlu. Gvern li jqis lil kulħadd indaqs mingħajr ebda distinzjoni.
Il-lokal tagħna ta’ l-Isla se jkollu elezzjoni doppja minħabba li se ssir ukoll l-Elezzjoni tal-Kunsill Lokali. Hawn ukoll il-Partit Laburista jista’ jkollu bidu ġdid u jagħmel id-differenza. Hemm bżonn li kull Senglean iħares lejn l-interess tal-lokal tiegħu u jara f’idejn min jista’ jafda beltna għal dawn it-tliet snin li ġejjin. Trid toħroġ l-enerġija, il-ħeġġa u l-entużjażmu tal-kandidatura qawwija li se jkun qiegħed joffri l-Partit Laburista fil-Lokal tal-Isla.
Kif darba qal xi ħadd, “iġġudikaw fuq dak li għamilna”. Jien hekk inħeġġeġ lis-Sengleani u l-Maltin kollha, biex jiġġudikaw fuq dak li għadda.
Għalhekk l-ewwel u qabel kollox kulħadd għandu jagħżel Labour bħala soluzzjoni għall-ġid tagħna u ta’ uliedna.
Wenzu Mintoff
GonziPN
Gonzi for President of the United States of Malta. Kienet ilha ttekktek li n-Nazzjonalisti kienu se jaħdmu din il-kampanja elettorali fuq il-mudell Amerikan, bil-First Lady, bil-bżieżaq, fanfarri u biċ-chewing gum kollu li jgħaqqad il-politika Amerikana.
