Aħbarijiet | 03 ta’ Frar 2008 Nr 66

L-elezzjoni fuq moħħ l-Isqfijiet

Sabrina Agius
sagius@mediatoday.com.mt

Fi żmien fejn pajjiżna mhux biss riesaq lejn elezzjoni ġenerali imma dieħel ukoll għaż-żmien
tar-Randan, l-isqfijiet wissew lill-politiċi biex ma jitilfux il-maturità politika kif ukoll talbu lill-poplu biex ma jonqosx mir-rispett lejn il-proxxmu minħabba diverġenzi politiċi.
L-Arċisqof ta’ Malta Pawlu Cremona u l-Isqof ta’ Għawdex Mario Grech,
fil-pastorali għar-Randan wissew li hemm bżonn li jkun hemm iktar maturità politika f’pajjiż demokratiku. Maturità politika tevita li jkun hemm attakki personali fuq individwi.
“Il-maturita politika titlob li d-dibattitu jkun iktar madwar l-argumenti u l-veduti milli madwar il-persuni,” sostnew l-isqfijiet.
Huma qalu li d-diversità tifforma parti mid-demokrazija u għandha tiġi rispettata. Iċ-ċokon ta’ pajjiżna ma jiflaħx li “nibqgħu nippolitiċizzaw kollox” jistqarru l-Isqfijiet.
L-isqfijiet esprimew ukoll it-tħassib tagħhom dwar it-tibdil fis-soċjetà fejn qed tisseddaq kultura li tpoġġi l-materjaliżmu fuq kull ħaġa oħra. L-isqfijiet wissew li dan qed iwassal biex iżid il-vojt f’kull individwu.
Id-diskors ta’ l-Isqfijiet ħeġgeġ biex żmien ir-Randan ikun żmien ta’ riflessjoni dwar dak li wieħed qed jagħmel b’ħajtu u b’hekk għandu japprofitta biex jersaq iktar lejn it-tagħlim nisrani u japplikah fil-ħajja ta’ kuljum.
Cremona u Grech imbagħad qabblu l-poplu Malti ma’ dak Lhudi. L-Isqfijiet jemmnu li pajjiżna għandu mixja twila sakemm jeduka ruħu u jerġa’ jkun fit-triq it-tajba.
“Aħna wkoll bħala Maltin u Għawdxin għaddejjin minn mumenti storiċi meta dak li dejjem emminna qed jgħaddi mill-għarbiel ta’ kif qed ngħixu bl-esiġenzi ta’ llum. Sikwit ninfixlu xi rridu u x’qed infittxu u ma nibqgħux naraw sens fil-fidi li rċevejna,” saħqu.
Huma biss il-valuri, skond l-Isqfijiet, li jistgħu jżommu lis-soċjetà fuq saqajha.
Is-servizz li qed toffri l-Knisja għal din is-soċjetà diżorjentata hu li tagħmel iktar kredibbli l-Evanġelju ta’ Kristu.
Li wieħed ikollu qalb ġeneruża
għall-isqfijiet mhux biżżejjed.
“Sikwit aħna niftaħru bil-qalb kbira u ġeneruża tagħna bħala poplu jew
bl-identità tagħna bħala poplu nisrani. Imma llum dan mhuwiex biżżejjed.”