Aħbarijiet | 03 ta’ Frar 2008 Nr 66

Ġlieda bejn TVM u One għall-udjenzi

Fir-radju l-Bay fuq quddiem

Franica Pulis
fpulis@mediatoday.com.mt

Stħarriġ li ippubblikat l-Awtorità tax-Xandir din il-ġimgħa juri li aktar minn nofs in-nies intervistati ma jisimgħux ir-radju filwaqt li l-aktar erba’ stazzjonijiet preferiti huma l-One, Bay, RTK u Calypso.
One Radio għandu l-ikbar udjenza fost in-nisa filwaqt li Bay Radio għandu udjenza iktar maskili.
In-nies li għandhom minn 80 sena ’l fuq iħobbu jisimgħu l-aktar l-RTK u Radju Marija bl-istess daqs. Il-Bay Radio jolqot tliet faxxi ta’ età bħala stazzjon tar-radju favorit mit-12-il sena sa 14, minn 15-il sena sa 24 u minn 25 sena sa 29.
Il-Calypso hu l-aktar magħruf ma’ dawk li għandhom bejn it-30 sena u l-49 u One Radio jinżel l-iktar tajjeb mas-semmiegħa bejn il-50 sena u s-79, li bħala tieni preferenza għandhom lil Radju Malta (50-64) u RTK (65-79).
L-RTK magħruf l-aktar mas-semmiegħa Għawdxin u One Radio mas-semmiegħa tan-naħa ta’ isfel ta’ Malta. Il-Bay popolari man-naħa ta’ fuq u fiċ-ċentru ta’ Malta.

Televixin
Mindu bdiet l-iskeda ta’ Ottubru l-istazzjonijiet televiżivi Maltin serqu mill-udjenza li kienet issegwi numru sostanzjali ta’ stazzjonijiet Taljani. Fil-fatt fis-sajf l-istazzjonijiet Maltin lanqas kellhom udjenza ta’ nofs in-nies intervistati b’rata ta’ 43.6 fil-mija, ftit aktar mit-30 fil-mija tan-nies li kienu jsegwu stazzjonijiet Taljani.
Bl-iskeda ta’ Ottubru l-udjenza ta’ l-istazzjonijiet telgħet għal 60.4 fil-mija b’żieda ta’ 16.8 fil-mija. Smash TV biss ma żiedx fl-udjenza tiegħu bi tnaqqis ta’ b’0.6 fil-mija mill-iskeda sajfija. L-istazzjonijiet Taljani naqsitilhom l-udjenza b’8.2 fil-mija.
Bħala stazzjonijiet TVM għandu l-akbar udjenza iżda One TV l-aktar li jdumu jarawh nies minkejja li għandu inqas nies li jarawh.
Mario Axiaq li ħadem fuq l-istħarriġ spjega li hemm aktar nies li jsegwu għal ħinijiet twal il-One TV, li hu l-istazzjon preferit tagħhom iżda hemm iktar nies li jaqilbuh fuq TVM kultant ħin biex jaraw l-aħbarijiet jew programmi oħra.
10.8 fil-mija mill-ispettaturi jaraw it-telebejgħ li għalkemm niżel bi 3.2 fil-mija mill-aħħar stħarriġ li sar l-ammont xorta mhuwiex żgħir. L-aktar faxxa ta’ età li ssegwi t-telebejgħ hi dik bejn il-50 sena u 64, l-istess faxxa li tara l-aktar stazzjonijiet televiżivi Maltin.
Mingħajr l-ebda sorpriża l-ġenerazzjoni żagħżugħa ssegwi l-aktar l-MTV u l-Italia 1.
In-nies jaraw l-aktar televiżjoni bejn is-7.30pm u d-9.30pm bil-quċċata tintlaħaq għall-ħabta tat-8.30pm.