Aħbarijiet | 03 ta’ Frar 2008 Nr 66

Dal-lejl il-PN irrekordja d-diska ta’ l-elezzjoni

Julia Farrugia

Il-Partit Nazzjonalista l-bieraħ filgħaxija kien qed jirrekordja l-filmat uffiċjali li se jakkumpanja l-kanzunetta li se juża l-partit fil-kampanja elettorali.
Għal dan il-video uffiċjali ntalbet l-għajnuna ta’ numru ta’ kantanti u personalitajiet.
Illum tista’ tiżvela li għall-ħabta tas-sebgħa ta’ filgħaxija numru ta’ uċuh familjari mal-poplu Malti bdew deħlin fid-Dar Ċentrali f’Tal Pietà.
Fost dawn kien hemm kantanti li irrappreżentaw lil pajjiżna fl-edizzjonijiet mhux daqstant imbiegħda ta’ l-Eurovision Song Contest. Xogħol dawn il-persuni kollha kien li waqt il-ġbid tal-filmat jidhru qed ikantaw il-kliem tad-diska tal-Partit Nazzjonalista. Fir-realtà d-diska bis-sound proprja kienet rekordjata fil-jiem li għaddew.
Nifhmu li d-diska li se jippreżenta l-Partit Nazzjonalista se tkun waħda b’messaġġ pożittiv fosthom li l-pajjiż wettaq numru ta’ suċċessi u li flimkien wieħed jista’ jkompli jirnexxi.
Id-diska tal-PN se tkun ir-risposta għad-diska mnedija diġà mill-Partit Laburista bl-isem ta’ “The Only Way is Up”. Din il-kanzunetta xxandret għall-ewwel darba bħal llum ġimgħa waqt il-Konferenza Ġenerali tal-MLP.