Aħbarijiet | 03 ta’ Frar 2008 Nr 66

Fabri jeħel fil-ventilatur

Julia Farrugia
Frank Fabri, li għal dawn l-aħħar snin kien is-Sindku tar-Rabat, irriżenja uffiċjalment mill-kariga tiegħu wara aktar minn xahar u nofs ta’ aħbarijiet kuntrastanti minn ġimgħa għall-oħra.
Riċentament Fabri kien sostna ma’ din il-gazzetta li “kien sab ventilatur u se jgħaddi minnu” u fisser li sab triq kif jista’ jibqa’ Sindku fl-istess ħin li nħatar Prinċipal ta’ wieħed mill-Kulleġġi.
Dakinhar kien qal li kellu laqgħat ma’ uffiċjali għolja mid-Dipartiment ta’ l-Edukazzjoni.
Iżda ġimgħa ilu Illum żvelat kif minkejja li Fabri qal li jista’ jibqa’ jżomm il-kariga ta’ Sindku fil-verità l-affarijiet kienu differenti.
Din il-gazzetta tista’ tikkonferma li fuq din il-kwistjoni ttieħed ukoll il-parir ta’ l-Avukat Ġenerali.
Din il-ġimgħa s-Segretarju Eżekuttiv tal-Kunsill Lokali tar-Rabat ikkonferma li Frank Fabri issa uffiċjalment irriżenja mill-Kunsill għaliex “il-kariga professjonali tiegħu hi inkompatibbli mad-dmirijiet ta’ Sindku u għalhekk din ta’ l-aħħar, kif jikkonferma s-Segretarju Permanenti fil-Ministru tal-Edukazzjoni, Żgħażagħ u Impjiegi, b’mod immedjat ma setgħetx tinżamm aktar.”
Nhar it-Tlieta li ġej Sandro Craus se jieħu l-ġurament tal-ħatra bħala Sindku ġdid tar-Rabat.