Aħbarijiet | 03 ta’ Frar 2008 Nr 66

Tittieħed azzjoni jum biss wara storja ta’ Illum

Julia Farrugia
Ġurnata wara li din il-gazzetta xandret l-appell ta’ familja minn Santa Venera li ilha tgħix b’ħofra ta’ żewġ sulari quddiem id-dar tagħha għal dawn l-aħħar tliet snin l-Awtoritajiet bdew jintervjenu fil-każ. Il-ħofra hi mingħajr ilqugħ diċenti u toffri periklu għal ħajjet familja b’tifel li llum għandha seba’ snin.
Wara mistoqsijiet ta’ din il-gazzetta l-Awtorità tas-Saħħa fuq il-Post tax-Xogħol ikkonfermat li l-għada li dehret l-istorja bagħtet uffiċjal tagħha fuq il-post biex jitkellem mal-familja milquta.
Skond l-Awtorità f’xi żmien partikolari “kienu ħallew ittra fuq letterhead ta’ l-Awtorità biex is-sid jikkuntattja lill-uffiċjali tagħha. Dan il-kuntatt baqa’ qatt ma sar.”John Zammit, il-kap tal-familja, ċaħad li qatt irċieva xi ittra.
“Niċħad li qatt irċevejt ittra mill-Awtorità. Kien fl-interess tiegħi li l-Awtorità tintervjeni u kieku rċevejt l-ittra li qed jgħidu li bagħtu kieku żgur li kont inweġibha,” saħaq Zammit.
Nhar l-Erbgħa l-Awtorità, flimkien ma’ team mill-Mepa, għamlet spezzjoni fi Triq Abela.
L-Awtorità sostniet li għamlet din l-ispezzjoni fil-preżenza ta’ l-iżviluppatur u tal-familja milquta.“Ġiet identifikata soluzzjoni li hi aċċettabbli għall-familja li għamlet l-ilment. Din kienet imressqa quddiem l-iżviluppatur li issa qed jikkonsulta mal-perit tiegħu. Is-soluzzjoni għandha tkun implimenta fi ftit tal-jiem,” saħqet l-Awtorità tas-Saħħa u s-Sigurtà.
“Kuntent ħafna li wara l-istorja fl-aħħar l-Awtoritajiet intervjenew. Jekk dak li qed ikun propost ikun attwat il-familja tiegħi fl-aħħar se tibda tgħix f’ħajja mingħajr periklu u b’inqas inkonvenjent,” qal Zammit.