Aħbarijiet | 03 ta’ Frar 2008 Nr 66

Ninu Zammit jonfoq €36,550 fi propaganda

Franica Pulis
fpulis@mediatoday.com.mt

Qabel ma’ l-Prim Ministru jsaffar is-suffara ta’ l-Elezzjoni Ġenerali l-Ministeru għar-Riżorsi u l-Infrastruttura ippubblika 25,000 kopja ta’ l-edizzjoni speċjali tar-rivista onSite li swiet madwar €36,550 (Lm15,691) lill-Kaxxa ta’ Malta.
Ir-rivista, li tista’ ssejħilha ktejjeb, għandha 115-il paġna kollha stampati bil-kulur fuq karta ħoxna tleqq. Din tinkludi intervista mal-Ministru Ninu Zammit fejn jiftaħar li l-Ministeru ħadem biex idaħħal ‘prattiċi ġodda ta’ xogħol fejn kull ħaddiem jagħti l-ġurnata tax-xogħol tiegħu’ kif ukoll ristrutturar tad-dipartimenti u sezzjonijiet fi ħdanu li biddlu t-timbru ħażin li għandhom il-ħaddiema
tal-Gvern.
Matul l-intervista jkompli jiftaħar dwar kemm saru xogħlijiet max-xtajta, il-bajjiet, ir-restawr li sar fis-swar, il-proġetti futuri għal prevenzjoni tal-għargħar, il-bosta xogħlijiet li saru mal-Belt u ġonna pubbliċi.
Minbarra l-intervista hemm ukoll kitbiet qosra dwar kull proġett li jissemma. Il-biċċa l-kbira tal-paġni fihom ritratti tax-xogħlijiet li saru mill-Ministeru matul dawn l-aħħar ħames snin. F’ħafna minnhom jidher ukoll Zammit jitkellem mal-ħaddiema waqt ix-xogħol ta’ tisbiħ.
L-għan tal-Ministeru hu li jqassam
ir-rivista lil Ministeri kollha, lil kull Kunsill Lokali madwar Malta u Għawdex u lil bosta rappreżentanti tal-mezzi tax-xandir lokali. Minbarra dawn bosta residenti minn lokalitajiet minn kull parti ta’ Malta u Għawdex se tingħatalhom kopja b’xejn.
Kelliem għall-Ministeru ta’ Ninu Zammit qal: “L-għan prinċipali ta’ din l-edizzjoni hu li dan il-ktejjeb jiġbor fih is-17 il-magazine li ġie ippublikat matul l-aħħar ħames snin kif ukoll jirrifletti vetrina ta’ xogħlijiet li fil-biċċa l-kbira tagħhom twettqu mill-ħaddiema fi ħdan il-Ministeru għar-Riżorsi u Infrastruttura.
“Hu d-dmir tal-Gvern li jinforma lill-pubbliku in ġenerali rigward ix-xogħol ta’ tisbiħ, restawr, konsolidament u xogħlijiet relatati mal-prevenzjoni mill-għargħar, liema xogħlijiet huma, bla dubju, ta’ fejda għal pajjiżna.”