Pjazzetta | 03 ta’ Frar 2008 Nr 66

Il-festival ta’ l-opra jiftaħ b’Cinderella

Id-disa’ edizzjoni tal-BOV Opera Festival jiftaħ nhar il-5 ta’ Marzu bl-opra Cenerentola ta’ Gioacchino Rossini li se tittella’ f’Malta għall-ewwel darba mit-Teatro Borgatti di Cento flimkien ma’ l-Orkestra Nazzjonali mmexxija mill-Prof Maestro Michael Laus.
Il-festival jinkludi wkoll Gianni Schicchi ta’ Giacomo Puccini, li se ssir biex tfakkar il-150 anniversarju mill-mewt ta’ Puccini, u Notte di un Nevrastenico ta’ Nino Rota. It-tnejn se jittellgħu mit-Taljani Operalaboratorio fit-Teatru Manoel nhar l-10 ta’ Marzu u t-12.
Il-BOV Opera Festival twessa’ fir-repertorju billi stieden ukoll lill-British Vocal Ensemble li jippreżenta I Fagiolini, varjetà ta’ arji mill-opri ta’ Claudio Monteverdi, fil-Mużew ta’ l-Arkeoloġija b’kollaborazzjoni mal-British Council. Il-grupp Britanniku magħruf l-iżjed għall-mużika Rinaxximentali u kontemporanja li tinkludi wkoll biċċiet sekulari għall-kor u biċċiet orkestrali fi produzzjoni semi-drammatizzata. Din se ssir nhar id-9 ta’ Marzu.
Bħal fis-sentejn ta’ qabel, il-BOV Opera Festival ta’ din is-sena qed ikun megħjun minn Valletta Fund Management Ltd. u mill-Middlesea Valletta Life Assurance Co. Ltd. 
Dr. Peter Fenech, Chairman tat-Teatru Manoel, qal: “il-kollaborazzjoni tant mistennija bejn it-Teatru Manoel u l-Bank of Valletta kull sena wasslet għal serje ta’ produzzjonijiet ta’ l-ogħla kwalità matul dawn l-aħħar disa’ snin. Hu mistenni li l-produzzjonijiet imħejjija għal din is-sena jkomplu jsaħħu r-reputazzjoni mill-aqwa li l-BOV Opera Festival bena fil-kalendarju kulturali Malti.”
Tonio Depasquale, Kap Uffiċjal Eżekuttiv tal-BOV, żied jgħid li kull sena jsir ħafna xogħol b’dedikazzjoni kbira biex jittella’ l-BOV Opera Festival u li l-bank hu kuntent li l-Festival qed jitqies bħala wieħed mill-aqwa attivitajiet kulturali fil-pajjiż b’reputazzjoni mill-aqwa f’Malta u barra.