Ittri | 03 ta’ Frar 2008 Nr 66

Koalizzjoni ma’ min?

Minn John Schembri,
Żurrieq

“Jekk l-Alternattiva Demokratika tkun parti mill-gvern li jmiss se naħdmu biex din il-proposta tintlaqa’ mhux biss mill-gvern ta’ koalizzjoni imma mill-Parlament kollu. Il-Maltin jixirqilhom aħjar.”
Hekk spiċċa l-artiklu tiegħu Edward Fenech ta’ l-AD, il-Ħadd li għadda. Il-proposta li kiteb tagħmel ħafna sens. Iżda laqatni b’mod partikolari d-diskors dwar koalizzjoni.
Ftakart meta waħda attriċi sabiħa ipproponiet lil Albert Einstein biex jiżżewġu għax skond hi, kieku jkollhom tfal sbieħ bħalha u għorrief bħal Einstein.
Il-ġenju kien pront staqsiha, “U jekk jiġu koroh bħali u stupidi bħalek, x’nagħmlu bihom?”
Naħseb ħafna bħali toħroġilhom l-istess tip ta’ mistoqsija: ma’ min taħseb li se tkun f’koalizzjoni l-Alternattiva?
Żgur mhux mal-partit ta’ Capua, dawk wisq lejn il-lemin. Żgur mhux mal-Partit Nazzjonalista għax Claire Bonello ta’ l-Alternattiva iktar taħsibha Laburista bl-attakki li tagħmel fuq il-gazzetti kontra l-PN!
Ma baqa’ ħadd ħlief tal-Lejber. Ma tridx tkun xi bravu biex tara li l-attakki fuq tal-Labour naqsu. Kemm kienu flimkien magħhom kontra l-impjant ta’ Sant’Antnin.
Jekk ta’ l-Alternattiva jtellgħu siġġu fil-Parlament u jaħsbu li se jaħdmu spalla ma’ spalla ma’ tal-Labour naħseb li aħjar jerġgħu jaħsbuha għax ma nistax nifhem kif partit tal-Ħodor se jagħmel kompromessi ma’ partit li qed iwiegħed li se jnaqqas is-soprataxxa fuq il-kontijiet tad-dawl u l-ilma bin-nofs lil kulħadd jiswa’ kemm jiswa’ ż-żejt.
Il-Kelliem dwar l-Ekonomija u l-Finanzi jaf sewwa kemm din il-lixka li ħareġ biha l-Labour ma tagħmilx ħlief ħsara lill-ekonomija u lill-ambjent li l-Alternattiva għandha tant għal qalbha.
Naħseb li l-AD iktar se sservi ta’ staffa għall-Labour biex jitilgħu fil-Gvern. Nafu biżżejjed x’ġara fl-elezzjoni ta’ l-Ewro Parlamentari. Se naslu fl-ironija fejn l-Alternattiva se tagħti palata lill-MLP biex iżidu l-emmissjonijiet fl-arja minn ħruq ta’ żjut?
Tassew li aħna l-votanti jixirqilna aħjar.