Ittri | 03 ta’ Frar 2008 Nr 66

Żwieġ għal koppji gay

Minn Marisa Xuereb,
Malta Gay Rights Movement,
Mosta

L-editorjal tas-6 ta’ Jannar kien l-ewwel wieħed fl-istorja tal-gazzetti Maltin li għamel stqarrija ċara u raġunata favur ir-rikonoxximent taż-żwieġ bejn persuni ta’ l-istess sess.
Dan l-editorjal spikka għall-fatt li għall-kuntrarju ta’ ħafna artikli li jinkitbu f’dan ir-rigward ma qagħadx jikkwalifika liema drittijiet partikolari għandhom jingħataw lill-koppji gay u liema le.
L-argument favur ir-rikonoxximent taż-żwieġ bejn persuni gay mill-Istat kien ibbażat purament fuq l-imħabba, l-istabilità fir-relazzjoni u n-nuqqas ta’ diskriminazzjoni, fatturi li spiss huma minsija minn dawk li jargumentaw kontra ż-żwieġ ta’ koppji gay.
Il-Malta Gay Rights Movement jixtieq juri l-apprezzament tiegħu għal dan l-editorjal u jittama li jkun ta’ spunt għal dibattitu aktar miftuħ u bilanċjat dwar dan is-suġġett.