Ittri | 13 ta’ Jannar 2008 Nr 63

SMS tal-Mepa mhux aġġornat

Minn Kevin Tanti,
Santa Venera

Dan iż-żmien kulħadd juża’ t-teknoloġija biex jinforma lill-klijenti tiegħu dwar is-servizzi li joffri. Il-MEPA mhux l-inqas. Il-MEPA tuża’ s-servizz ta’ l-internet jew ta’ l-SMS biex tinforma lill-applikant fejn tkun waslet l-applikazzjoni tiegħu.
Il-problema hi li mhux dejjem tkun aġġornata. Illum 6 ta’ Jannar, bgħatt SMS biex inkun naf fiex waslet l-applikazzjoni li kienet differita fil-15 ta’ Ottubru 2007. Ħaġa ta’ l-iskantament ir-risposta kienet li se tingħata deċiżjoni fil-15 ta’ Ottubru 2007.
Fuq l-internet għamilna pass żgħir ’il quddiem għax hemm miktub li l-applikazzjoni ġiet differita u hemm ir-raġuni. Fil-lista tal-korrispondenza hemm li l-perit bagħat pjanti ġodda fit-30 ta’ Novembru.
Allura possibbli li tal-Mepa m’għandhomx ħin biex jaġġornaw is-sistema ta’ l-SMS? Possibbli m’hemmx ċans li tingħata d-data ta’ meta se jinstema’ l-każ tiegħi?
Dan il-każ kollu hu dwar jekk nistax nibdel il-gallarija jew le. Risposta li għandha tkun ċara, iva jew le. L-applikazzjoni tmur lura għal Awissu 2007.