Wenzu Mintoff | 06 ta’ Jannar 2008 Nr 62

Gaff Madornali

Din is-sena l-ġdida bdejtha bit-tajjeb mat-tokki ta’ nofs il-lejl bil-mużika tal-Maestro, poeta u kantant mill-aqwa Antonello Venditti fit-trasmissjoni diretta mill-belt Taljana ta’ Rimini fuq ir-Rai Uno.
Minkejja li dan il-kantawtur leġġendarju Taljan ma tantx jippresta ruħu għat-tbaħrid u l-briju ta’ lejlet l-Ewwel tas-Sena, l-atmosfera li toħloq il-mużika u l-lirika tiegħu hi unika u fiha ċertu seher li diffiċli tiddeskrivih.
Biex tkun verament kompluta l-kariżma ta’ Venditti tkompli tissaħħaħ bil-ħsieb politiku xellugi tiegħu li minkejja li mhux iffossillizzat f’xi ideoloġija tal-passat xorta waħda hu ankrat ma’ prinċipji u ideali li ma jmutu qatt.
Hekk kif xi jumejn qabel sirt naf li Antonello Venditti kien se jkun f’dan il-programm speċjali minn Rimini, wara li rajt kif benġilta mal-mara, ħassarna l-booking li kellna u bqajna d-dar nogħxew u nkantaw ma’ Venditti. Ta’ fanatiku li jien, lill-mara u t-tifla l-ħin kollu bdejt ngħidilhom “la bdejnieha ma’ Venditti, din is-sena l-ġdida bilfors se tkun waħda tajba!”
Naturalment f’dik l-atmosfera effervexxenti u ta’ festa ma kienx il-lok li jindaqqu u jitkantaw il-ballati ta’ l-imħabba kollha skossi bħal Alta Marea, Ogni Volta u Amici Mai u minflok smajna bċejjeċ iktar movimentati li tista’ tiżfen magħhom bħal In questo mondo di ladri, Che fantastica storia è la vita, Ci vorebbe un’ amico u Ricordati di me u s’intendi ma setgħux jonqsu s-siltiet Dalla pelle al cuore u Regali di Natale mill-aħħar album ta’ Venditti li ma’ jistax jonqos li ma nikkunsidrahx bħala kapolavur.
Minn dan l-album tolqotni l-iktar Tradimento e Perdono dedikata lil Di Agostino Bartolomei, Marco Pantani u Luigi Tenco li kienu jinżammu fuq wiċċ l-idejn fl-aqwa tal-karriera tagħhom imma wara li kien għadda l-aqwa tagħhom ħassewhom abbandunati u minsija tant li f’mument ta’ disperazzjoni spiċċaw temmew ħajjithom b’idejhom.
L-għabex ta’ din is-sena l-ġdida kien kollu marbut mal-miġja fostna tal-munita ewro. Skuża tajba biex il-Maltin u l-Għawdxin jiċċelebraw flimkien bħala poplu wieħed mingħajr distinzjoni, l-istess bħalma t-Taljani għamlu f’Rimini, l-Ingliżi fi Trafalgar Square, il-Franċiżi fi Place de la Concorde u tant postijiet oħra madwar id-dinja.
Imma ħasra li ma kellux ikun hekk ukoll f’Malta. L-ispirtu ta’ dawn il-ġranet megħjun xi ftit ukoll minn dak li bħal dan iż-żmien ta’ festi jiġi mlegleg bil-gliegel, kellu jipprevali u jirbaħ fuq kull kunsiderazzjoni oħra.
Iċ-ċelebrazzjonijiet ta’ l-ewro kellhom iservu ta’ pretest tajjeb biex il-Maltin u l-Għawdxin, huma ta’ liema kulur huma, jiddevertu u jieħdu gost bil-kumpanija ta’ xulxin mingħajr ma jkollhom għalfejn jagħmlu dak li s-soltu jagħmlu li jħallsu flus tajba għal servizz tal-qamel.
Bejn pawsa u oħra tal-kunċert ta’ Venditti għal ftit sekondi qlibtlu fuq One TV u stħajjiltni li mingħajr ma ridt kont qed nara n-Net TV għax ħlief preżentaturi u ġurnalisti tan-Net u ta’ Radio 101 ma bdejtx nara. Possibbli okkażjoni ta’ ċelebrazzjoni nazzjonali bħal din kellha tispiċċa tingħata din it-tonalità partiġġana meta faċilment setgħu jinstabu preżentaturi ta’ bixra mhux daqstant Nazzjonalista sfegatata bħal Nathaniel Attard u Amanda Ciappara, fost l-oħrajn!
Imma l-qofol intlaħaq, u ma flaħtx nissaporti iktar, meta fuq it-televiżjoni kelli nara l-wiċċ qaddies ta’ Giovanna Debono tgħid tagħha dwar l-ewro qalb il-bżieżaq bix-shorts irrigat ta’ Ira Losco fl-isfond jaqbeż warajha minn fuq il-palk fit-Tokk Għawdex.
Possibbli ma kinux jifilħu l-politikanti għal darba jegħlbu t-tentazzjoni li jieħdu rikba b’xejn minn fuq din l-okkażjoni u joqogħdu pass lura u jħallu l-poplu jiċċelebra kif irid u kif jogħġbu?
Kif ma stħawx l-organizzaturi ta’ din is-serata joħorġu bi programm bħal dak lejlet l-elezzjoni bi preżentaturi ġejjin kollha minn naħa waħda tax-xaqliba politika u bil-Prim Ministru Gonzi u d-dell tiegħu Kate jippruvaw jisirqu x-xena mat-tokki ta’ nofs il-lejl meta din it-trasmissjoni kienet se tixxandar fuq l-istazzjonijiet kollha tat-televiżjoni, inkluż One TV?
Ħallik li l-Prim spiċċa ġralu bħal Cinderella u żelaq fuq qoxra ta’ banana. Min jaf kif ħares il-Laburist medju bil-mexxej tal-partit tiegħu rikoverat l-isptar, jibda l-ewwel mumenti tas-sena l-ġdida bid-dehra ta’ Lawrence Gonzi fuq l-iskrin ta’ One TV qed jipprova jisraq ix-xena?
Imma bħalma jgħid il-Malti x-xitan m’għandux ħalib u xorta waħda jagħmel il-ġbejniet. Kellha tkun it-teknoloġija ta’ l-informatika fil-forma ta’ magna awtomatika li permezz tagħha jissarrfu u jiġu depositati l-flus li ċaħħdet lill-Prim Ministru Gonzi minn mument ta’ glorja. Il-magna ħarġitu ta’ mażetta quddiem il-cameras ta’ l-istampa internazzjonali.
Kien tassew patetiku wieħed mill-paġġi ta’ Gonzi jisforza jżomm subgħajh fuq it-tapp tal-flixkun tax-xampanja li laħaq sarlu vjola sakemm fl-aħħar, ħareġ li kellu joħroġ, mhux minn dik il-magna imma minn oħra ftit ’il bogħod minnha.
Iktar ma toqrob il-ġurnata ta’ l-elezzjoni iktar m’hu se jkun in voga l-irkib mill-politikanti, jew kif isibuhom l-Ingliżi, il-free rides. Wara l-gaff madornali ta’ l-ATM li ma ħadmitx u li fi kliem l-istqarrija tal-BOV spiċċat imbarazzat lil Lawrence Gonzi f’mument li kellu jkun wieħed ta’ glorja, kont nistenna li propagandisti Nazzjonalisti jippruvaw inessuna mill-aħjar li jistgħu din il-ġrajja tal-mistħija.
L-istqarrija tal-BOV ippruvat mill-aħjar li setgħet tiskolpa għal kollox lill-Kumitat tal-Bidla għall-Ewro u spiċċat waħħlet fir-rassa tan-nies li kien hemm madwar din l-imniefaħ ta’ magna.
Bħalma jiġri dejjem meta l-affarijiet jiġu sew jieħdu l-kredtu l-Ministri u l-figatelli tagħhom u meta l-affarijiet imorru ħażin it-tort jingħata lin-nies. Ma nafx jekk kellux x’jaħti dak il-funzjonarju bil-ħarsa ta’ mbeċċilli bil-flixkun tax-xampanja f’idu li mingħajr ma ried seta’ laqat il-magna bit-tapp tas-sufra tax-xampanja.
Imma fil-ferneżija li kompliet tirkbu għall-finijiet elettorali mingħajr ma ried Gonzi reġa’ fakkarna fil-gaff madornali ta’ l-ATM meta fettillu joffri għall-irkant lid-Dar tal-Providenza €50 li ħarġu minn magna oħra minflok il-famuża waħda li ma ħadmitx għax bħal donnu stħat mill-attenzjoni tal-kameras li kienu mixħutin fuqha.
Dawn il-qaħbeċ €50 bil-firma ta’ Gonzi fuqhom għamlu ġurnata sħiħa jissemmew fil-glorja u fil-batal matul il-maratona ta’ l-RTK. B’50 ewro, mhux żgur Lm22 b’kollox, Gonzi kellu riklam b’xejn għal ġurnata sħiħa la l-organizzaturi ippermettewlu dan fl-inġenwità tagħhom.
Imma hu u jagħmel dan forsi nesa l-Prim Ministru li hu illegali li tikteb jew tiffirma fuq karta tal-flus li hi l-valuta legali ta’ dan il-pajjiż biex b’hekk f’temp ta’ ftit sigħat spiċċa għamel gaff oħra.