Toni U Peppi | 06 ta’ Jannar 2008 Nr 62

X’riżoluzzjonijiet għamilt?

TONI

Jien qatt ma emmint fir-riżoluzzjonijiet ta’ l-ewwel tas-sena. L-ewwel santu ħaġa, dawn qishom isiru biex jinkisru. It-tieni, sena m’hi xejn ħlief kejl, bħalma hu l-metru u l-kilogramm.
Ma hemm xejn materjali f’dak kollu li jifred lill-bieraħ mil-lum jew xi tieqa li tħares għal fuq dak li ġej. Sena huwa ħsieb artifiċjali u allura daqstant artifiċjali.
Dawn il-festi ma “gawdejthom” xejn. Kważi mill-bidu ta’ Diċembru sal-mument li qiegħed nikteb dan l-artiklu bqajt maqful id-dar. Ma iddispjaċinix. Xejn xejn it-temp kien ikrah u mill-ġiri fuq barra jien mhux nieqes.
Qattajt ħafna ħin mal-familja, bit-tajjeb u l-ħażin li dan iġib miegħu u għaddejt sigħat twal naqra u nikteb. Biżżejjed ingħid li kelli proġett li kien ilu s-snin iberren f’moħħi, kważi lestejt nofsu. F’dawn l-għaxart ijiem skoprejt diversi affarijiet.
Darba minnhom kont tiela’ t-taraġ u tlabt l-għajnuna tat-tifla ż-żgħira. Mit-tlieta, din l-aktar li ħarġet tixbaħni mill-karattru. Għaddietli kumment li bqajt naħseb fuqu. Qaltli li kien l-ewwel darba li qattajt daqshekk żmien magħhom u biex nagħmel hekk kelli nkun ma niflaħx. Qaltli li jiena ma kontx nafhom biżżejjed, tant li sajjartilhom il-klamari, meta la hi u lanqas ħuha t-tewmi ma kienu jħobbuhom. Kemm ili ma noħroġx mid-dar, sa kwizz fuq ħajjithom għamluli u minn għaxra mhux żgur qtajt tlieta. Skond huma, prova ċara ta’ kemm ma kontx nafhom.
Il-messaġġ ħadtu. Mhux il-flus kollox fil-ħajja. Irrid innaqqas mix-xogħol u mill-impenji biex ngħaddi aktar ħin mal-familja. L-aħjar żmien diġa’ tliftu meta aħna nkunu midfunin fl-attivitajiet ta’ matul is-sena, b’kull jum iġib ieħor warajh u kull sena oħra warajha mingħajr ma nintebħu nkunu qisna kastelli tar-ramel qegħdin nittieklu ftit ftit. Din hi l-ewwel riżoluzzjoni: li nipprova nqatta’ aktar ħin ma’ dawk li fil-ħajja niħduhom “for granted”.
Kemm domt id-dar qrajt ħafna aktar. Meta ssib ħin biex taqra kotba ta’ kwalità tintebaħ kemm matul is-sena naħlu ħin naqraw ħwejjeġ li ma jagħtu xejn lura lill-moħħ. Il-gazzetti ta’ kuljum huma wħud minn dawn il-ħwejjeġ. Mimlijin tqasqis nofs aħbarijiet, artikli ta’ nies mill-aktar medjokri (tiegħi mhux esklużi) u politika lokali mimlija vavati u bluha ta’ min hu maqtugħ minn man-nies. F’dawn il-jiem twal li għaddejt fil-kamra tiegħi kelli l-ħin naqra ftit storja, ftit letteratura, insomma ftit minn dak li matul is-sena nnaqqar bil-ħatfa.
Għalhekk it-tieni riżoluzzjoni hi li safejn nista’ inkompli għaddej fil-arja pura ta’ qari aktar sustanzjuż. Nipprova mmur għal aktar “slow food” tal-moħħ milli għal dak “fast” li nikkunsmaw kuljum. Tkun xi tkun iċ-ċirkustanza ser nipprova ngħaddi aktar ħin naqra, milli naħli ħini ma naqrax biex naqra dawk li jiktbu ta’ madwari. Diġa’ għamilt lista ta’ kotba. Qtajtha li l-ewwel wieħed ta’ għal din is-sena jkun “The God Delusion”. Il-mara qratu u qaltli mgħaġġbin kemm huwa tajjeb.
Ktibt ħafna. Anke matul is-sena nikteb ħafna. Iżda skond x’tikteb. Dejjem nagħmel ħilti biex nevita li nikteb fuq suġġetti li kulħadd ikun qiegħed jikteb dwarhom. Nipprova ukoll li ma nkunx bħal dak il-kelb qiegħed iħares fil-megafonu tat-tikketta tad-diski li jisimha “His Master’s Voice”.
Iżda f’dinja mimlija preġudizzji u pressjoni l-ħin kollu, ħafna drabi tikteb ħwejjeġ li fil-ġabra u fis-skiet ta’ min hu seren u għandu cans jaħseb ma kontx tiktibhom. Matul is-sena ħafna jiktbu qishom għassiesa ta’ xi forti.
Kemm domt id-dar ktibt dak li ridt. Għalhekk għamilt riżoluzzjoni li kemm jista’ jkun ser nikteb u nitkellem fuq ħwejjeġ li nagħzel jien u mhux li jagħzilli ħaddieħor. Din ir-riżoluzzjoni tgħodd għalik, Sur Editur. Ser nipprova nkun aktar jiena minn ħaddieħor u nikteb fuq ħwejjeġ aktar soċjali u anqas “politiċi”. Din ir-riżoluzzjoni m’għandhiex tkun daqstant difficli għax fis-sena li għaddiet diġa’ ma tantx tbegħidt minnha. Iżda irrid ukoll naħseb daqsxejn għal rasi ma mmurx ninkalja.
Irrid nipprova niekol aħjar u nagħmel aktar sports. Din ir-riżoluzzjoni ili nagħmilha għal dawn l-aħħar 20 sena. Dejjem ser nibda u ma nibda qatt. Dan l-aħhar anke ritratti d-daqs ta’ passport ħadt biex ninkiteb f’gym, iżda fil-kartiera kienu u hemm għadhom. Dawk li huma bħali għandhom mill-iskarpan. Għal ħaddieħor żraben għandu kemm irid iżda hu joħroġ ħafi mid-dar. Matul is-sena għal ħaddieħor inħabirku ħafna iżda meta niġu biex nieħdu ħsieb tagħna nfusna naqgħu f’għażż qisu balżmu tal-ġisem.
Issa li daħlet il-munita ta’ l-ewro nagħti bqija tajba u ġusta kemm għalija kif ukoll għal min qiegħed iħallasni. Ser nipprova ma naqax fit-tentazzjoni li naqta’ għad-dritt jew inġib kollox għat-tond. La rrid nisraq iżda lanqas jisirquni. Nittama biss li din ir-riżoluzzjoni qegħdin jagħmluha dawk kollha li għandhom ħanut jew qegħdin fin-negozju.
Fl-aħħarnett ir-riżoluzzjoni tar-riżoluzzjonijiet: li jekk minn dawn ir-riżoluzzjonijiet ma nżomm xejn minnhom din is-sena, nipprova nżommhom is-sena ta’ wara!

PEPPI

Dawn huma l-10 riżoluzzjonijiet li qed nagħmel għal din is-sena.

Id-dar fuq il-mobile. Ibni Xandru jiġri warajja qed jipprova jkellimni. Naqta’ u jerġa jċempel. Nitkellem u naqta’. Xandru jitlobni nixtrilu mobile. Nistaqsih għaliex irrid mobile. Jgħidli: “Daddy, biex inċempillek ħa nkun nista’ nkellmek.” Allura iddeċidejt li kultant nibda nagħmel il-mobile silent. Naf li qed nirrabja ħafna nies għax s’issa ftit kienu dawk li ma jsibunix. Imma iddeċidejt. U lil dawk li jċemplu mingħajr ma jidher in-numru ma nweġibhomx. Dan x jiġifieri huma jafu n- numru tiegħi u jien ma nistax inkun naf in-numru tagħhom?
Li nibda nħalli għal għada dak li nista’ nagħmel illum. Ta’ madwari kważi kollha hekk jagħmlu u tgħidx kemm niġġieldu. F’isem il-paċi se nibda nagħmel bħalhom u nħalli kollox u lil kulħadd jistenna.
Dan l-aħħar iffissajt fuq inkwatru li qlajt, elettroniku naturalment. Inkwatru li jbiddel ir-ritratti kull ftit sekondi.Qed jirnexxieli insib ħin inżidlu aktar ritratti. Mir-ritratti niftakar fil-ħbieb li kelli, fil-familja kbira tiegħi li ilni ma nara. Veru ninħaraq li m’għandiex ċans nieħu gost magħhom. Issa ninsab determinat.Iż-żmien mhux jistennini u għalxejn ngħidlu biex jeħodha aktar bil-mod.
It-treadmill. Niġri għal nofs siegħa kuljum u nibqa’ fl-istess post. Bit-televixin quddiemi , bir-radju miftuħ, imma xorta niddejjaq. Kultant inkun tiela’ fuq biex nirkibha u nkun nixtieq imur id-dawl, ma taħdimx jew iċempel il-mobile b’xi bżonn urġenti. U tiskanta kif issir urġenti dan il-ħin….
Nibda nikteb teleserial li ilu jagħqad ġo fija żmien twil. Il-karattri xebgħu jiġġieldu biex joħroġu u issa bdew jagħtu bejniethom. Għandi lil Simon iffissat fuq Kyle, mejjet biex jgħidilha li l-għarus tagħha gay. Hemm imbagħad Nadia li ħoblot fil-ħabs minn kandidat ġdid fl-elezzjoni li jmiss. Hemm Francesca li xebgħet tgħid lill-boyfriend ma jisserfjax fuq l-internet iħuf għall-films pornografiċi għax tibża’ li jsib il-film xejn diċenti li kienet ħadet sehem fih hi. Ħa nieqaf għax se nispiċċa ngħidilkom l-istorja. Joe Friggieri darba fl-lecture qalilna: “Jekk trid tikteb, ikteb.” Tidher sempliċi imma 20 sena wara bqajt niftakarha. U hekk se nagħmel.
Se nerġa nibda ngħid ‘fil-qosor’ waqt ix-Xarabank. Għax sentejn ilu kont għamilt riżoluzzjoni li ma ngħidx ‘fil-qosor’ aktar u żammejtha. Issa ilni sentejn ma ngħidha u n-nies xorta jibqgħu jgħiduli li ndejjaqhom ngħid ‘fil-qosor’. Allura …..
Se nibda nasal fil-ħin għal kull appuntament li jkolli u nibqa’ nittama li jiġu tard. Jiena ma niddejjaqx nistenna għax huwa l-uniku mument li nkun qed naħli ż-żmien u m’għandix tort.
Se nipprova nibqa’ naċċetta iktar l-affarijiet li ma nistax inbiddel. Din filosofija li jekk tgħixha tbiddilek ħajtek. Ippruvajtha u ħadmet ħafna fuqi.
Nibda nilbes is-seatbelt. Kieku mhux għax ninqabad is-seatbelt ma nilbsux għax jirritani u jdejjaqni u jqabbiżhieli jħokk miegħi. Imma m’għandix raġun.
Inwiegħed li nżomm dawn ir-riżoluzzjonijiet għalija, ma ngħidhom lil ħadd, biex jekk, kif naħseb li se jiġri, niksirhom, ma naqax għan-nejk iktar milli waqajt is-sena l-oħra.