Aħbarijiet | 06 ta’ Jannar 2008 Nr 62

Il-prezz biex tgħix

Aktar milli nħarsu biss lejn l-għoli tal-ħajja nippreferu nħarsu lejn il-prezz biex wieħed jgħix ħajja diċenti. Filwaqt li fit-tieni kwart ta’ l-2008 meta jiskadu l-arranġamenti tal-Gvern man-negozjanti għal prezzijiet fissi fuq numru ta’ prodotti nistennew qabża ’l fuq fl-għoli tal-ħajja, iktar minn hekk se jkun il-baskett sħiħ tal-familja, li jinkludi wkoll id-dħul mill-paga, li se jiddetermina l-prezz tal-għajxien.
Il-pagi tagħna għadhom baxxi ħafna meta mqabbla ma’ dawk fuq il-kontinent u għalhekk l-għafsa ta’ prezzijiet dejjem telgħin inħasset b’mod qawwi f’dawn l-aħħar snin għax wasslet għal tnaqqir qawwi fil-kwalità tal-ħajja.
Minkejja t-tkabbir ekonomiku li kellna fl-2007, l-effett għadu ma nħassx fis-saffi kollha tas-soċjetà. Hemm nies f’ċerti setturi bħall-farmaċewtika li qed jaqilgħu pagi tajbin ħafna imma hemm setturi ta’ ħaddiema u kategoriji speċjali bħall-ommijiet weħidhom fejn l-uniku mod kif ikollhom għajxien diċenti hu permezz ta’ xogħlijiet sekondarji biex ikabbru d-dħul baxx tagħhom.
Il-baġit ipprova jindirizza din ir-realtà biċ-ċaqlieq fit-taxxa fuq id-dħul u ż-żieda fiċ-Children’s Allowance li issa se tingħata lil kull wild.
Id-dħul żejjed li se jaraw f’idejhom il-familji fl-2008 mhux se jkun biżżejjed biex ipatti għat-tnaqqir fi snin imgħoddija imma jista’ jkun pass biex jagħti ftit tan-nifs. It-tama hi li l-ekonomija tibqa’ tikber ħalli l-Gvern ikun jista’ jkompli jħaffef il-piż tat-taxxi jew idaħħal benefiċċji soċjali ġodda.
Ma jidhirx li hemm xi ċans li l-pressjoni fuq il-prezzijiet ta’ l-ikel se ċċedi fl-2008. Is-suq internazjonali tal-qmuħ u ċ-ċereali s’issa jidher li se jżomm il-kolp u qajla hemm ċans li ż-żidiet li rajna fl-għaġin, fl-irkotta, fil-ħalib, fil-ġobon u ikel ieħor ta’ kuljum fl-2007 se jitreġġgħu lura.
Nemmnu li l-ewro se tkun indrat malajr mill-konsumatur iżda din ukoll tista’ twassal għal żidiet żgħar fin-nefqa tal-konsumaturi fuq firxa ta’ prodotti u servizzi li se jpoġġu għafsa fuq il-but tal-familji. Dawn iż-żidiet mhux bilfors se jkunu frott l-abbuż. Ir-raġuni hi waħda ta’ prattiċità. Min kien jikkalkula li għandu Lm40 (€93.17) petrol fix-xahar issa se jkollu jiġbed għad-dritt u jwarrab €95. Il-pompi tal-petrol ma żidux il-prezzijiet imma l-valur ta’ l-ewro u l-karti tal-flus li se jkollna f’idejna ma jippermettux lill-individwu jżomm l-istess valur tal-Lira Maltija fil-baġit tal-familja.
Minkejja l-ftit tan-nifs li ngħataw bil-miżuri tal-baġit il-familji xorta se jħossu l-pressjoni ta’ ħajja iktar għolja.

Probabbli xi jseħħ: Il-prezz biex tgħix f’Malta fl-2008 se jkompli jitla’ anki jekk mhux bilfors bl-istess ritmu mgħaġġel tas-snin li għaddew.