Aħbarijiet | 06 ta’ Jannar 2008 Nr 62

Lura għal-lampi tal-gass

Problema li qajla qed jitkellmu dwarha l-politiċi hi l-kriżi ta’ l-enerġija li tista’ tolqot lil pajjiżna sa mis-sajf li ġej.
Bid-domanda għall-elettriku mid-djar dejjem tiżdied u bl-Isptar Mater Dei issa jiffunzjona b’mod sħiħ, fl-2008 se jkompli jikber il-piż fuq il-power stations.
Diġà fl-2007 rajna ċerti perjodi fis-sajf fejn kellna qtugħ estensiv ta’ elettriku. Anki jekk dan il-qtugħ mhux bilfors kien dovut għaż-żieda fid-domanda kien ‘twissija’ għal li ġej.
Skond rapport li tħejja mill-Enemalta fl-2006 dwar il-ġenerazzjoni ta’ l-enerġija, wara s-sajf ta’ l-2007 pajjiżna mhux se jkollu kapaċità żejda ta’ produzzjoni biżżejjed biex tagħmel tajjeb jekk ikun hemm ħsara f’xi turbina ewlenija. Ir-rapport pinġa sitwazzjoni xejn sabiħa.
Fl-2008, biż-żieda naturali fid-domanda għall-elettriku mid-djar u b’konsum ikbar minħabba l-Mater Dei, pajjiżna mhux se jkollu kapaċità żejda li jipproduċi l-elettriku u f’każ li jkun hemm ħsara f’xi turbina ta’ 60MW partijiet sostanzjali tal-pajjiż jistgħu jesperjenzaw qtugħ ta’ l-elettriku għal tul ta’ ħin mhux ħażin.
L-Enemalta ħasbet għal din is-sitwazzjoni u tinsab fil-proċess li tibni impjant ġdid f’Delimara li jista’ joħloq bejn 100MW u 120MW ta’ enerġija. Madankollu hu mistenni li dan l-impjant ikun lest fl-2009 u għalhekk nistennew li malli tibda tgħanni s-sħana ħames xhur oħra l-power stations ikunu qed jaħdmu b’ilsienhom barra bil-ħaddiema iżommu subgħajhom imsallbin li ma jinqalax xi għawġ barra mis-soltu.
L-2008 hi l-bidu ta’ triq mimlija problemi fil-qasam ta’ l-enerġija. Bl-għeluq sfurzat tal-power station tal-Marsa fi ftit tas-snin oħra rridu nsibu alternattivi ġodda ta’ kif nipproduċu iktar elettriku bl-inqas mod li jħammeġ l-ambjent. Pajjiżna jinsab f’salib it-toroq fejn iridu jittieħdu deċiżjonijiet li jiswew il-miljuni kbar ta’ ewro.
Skond l-Enemalta l-impjant il-ġdid mistenni jiswa’ madwar €116.5 miljun. Ir-rapport jgħid ukoll li biex inpattu għall-għeluq tal-power station tal-Marsa jeħtieġ li ningħaqdu mas-sistema ta’ l-elettriku fi Sqallija permezz ta’ cable taħt il-baħar biex nimpurtaw 200MW mill-kontinent. Proġett bħal dan ikun jiswa’ madwar €128 miljun.
U biex pajjiżna jilħaq il-livelli ta’ tniġġis imposti mill-UE u jevita multi kbar ikun aħjar jekk naqilbu miż-żejt għall-gass. Il-gass ikun irid jitwassal jew bil-vapuri imma dan ma jagħtix garanzija ta’ sigurtà għax il-vapuri jridu jbaħħru ta’ spiss lejn pajjiżna, jew nibnu pipe għal Sqallija biex il-gass jitwassal b’mod kontinwu. Proġett bħal dan, skond l-istimi ta’ l-Enemalta, ikun jiswa’ €151.4 miljun.
Apparti dan tinħtieġ spiża kapitali oħra ta’ madwar €70 miljun fuq medda ta’ snin biex jinbnew ċentri ta’ distribuzzjoni ġodda u jittejbu dawk eżistenti.
Dan kollu jfisser kont astronomiku ta’ ftit inqas minn €466 miljun li jridu jintefqu minn issa sa sitt snin oħra.
Konna fl-istess sitwazzjoni mwiegħra fl-1987 u b’kumbinazzjoni dakinhar il-pajjiż kien ukoll jinsab lejlet elezzjoni ġenerali.
L-amministrazzjoni l-ġdida li se titla’ wara l-elezzjoni se jkollha tħabbel rasha mhux ħażin biex tara li l-produzzjoni ta’ l-enerġija tibqa’ tissodisfa l-ħtiġijiet ta’ pajjiż li qed jiżviluppa. U bi proġetti oħra kbar bħal Tignè, Pender Gardens, Smart City u oħrajn li beħsiebhom jitlestew fis-snin li ġejjin, il-pressjoni fuq il-produzzjoni ta’ l-elettriku se tkun kbira ħafna.
L-2008 tista’ tkun biss il-bidu tat-triq li tarana nerġgħu noħorġu l-lampi tal-gass minħabba qtugħ ta’ elettriku, sakemm ma jittiħdux deċiżjonijiet malajr u fit-tul.

Probabbli xi jseħħ: Jekk is-sajf ikun kiefer nistennew qtugħ ta’ l-elettriku ħafna iktar ta’ spiss u għal tul ta’ ħin itwal bil-power stations ma jifilħux għall-piż żejjed.