Aħbarijiet | 06 ta’ Jannar 2008 Nr 62

L-ajruport iċaħħad lill-partitarji ta’ Juventus

• Diżappunt kbir għax il-Juventus mhux se jgħaddu mis-sala tal-wasliet fl-MIA
• “Hawn ġew ħadd mhu se jikkmandani” – il-Kap tas-Sigurtà tal-MIA

Mark Attard

L-eluf ta’ partitarji Juventini li llejla kien beħsiebhom imorru l-Gudja biex jilqgħu lill-kontinġent tal-Juventus fis-sala tal-wasliet ta’ l-ajruport se jibqgħu b’xiber imnieħer.
Skond Mario Cuomo, il-Kap tas-Sigurtà ta’ l-Ajruport Internazzjonali ta’ Malta (MIA), il-kumpanija ħadet deċiżjoni madwar sena ilu biex timijiet u personalitajiet ta’ fama mondjali ma jgħaddux b’mod normali mis-sala tal-wasliet iżda miż-żona riżervata.
Ikkuntattjat il-bieraħ Cuomo, b’ton aggressiv, spjega li d-deċiżjoni ttieħdet wara li kienu ġew AC Milan.
“Timijiet u personalitajiet ta’ ċerta portata li jġibu magħhom il-massa tan-nies se jibdew jgħaddu biss mill-VIP Areas. Wara dak li ħallew warajhom sena ilu dawk li telgħu l-ajruport biex jaraw il-Milan mhux se nerġgħu nissugraw li jiġrilna l-istess.
“M’hemmx x’tagħmel jekk inzertaw il-Juventus. Minn x’imkien ridna nibdew. Hawn ġew ħadd mhu se jikkmandani. Meta n-nies jibdew jedukaw irwieħhom u naraw li tgħallmu nerġgħu nbiddlu d-deċiżjoni tagħna,” sostna Cuomo.

Madankollu, meta mistoqsi kif se jkun jaf li n-nies edukaw irwieħhom jekk mhux se jagħti din l-opportunità lill-Juventini Maltin, Cuomo rrisponda b’ton arroganti: “Għandi l-mezzi tiegħi kif dan inkun nafu u żgur li mhux se ngħidu lilek.”
Din il-gazzetta tkellmet ukoll ma’ Joe Fenech, membru fil-Kumitat ta’ Juventus Club Malta u responsabbli mill-35 membru tas-sigurtà li l-Juventus se jkollhom magħhom f’kull ħin tul iż-żjara f’Malta. Hu stqarr li din kienet deċiżjoni stramba mill-MIA.
“Jien kont il-persuna li minn ġimgħat ilu kelli laqgħa ma’ Mario Bugeja u Patrick Cuschieri li minn naħa tas-sigurtà ta’ l-ajruport ma sabux problemi. F’daqqa waħda dak kollu li konna ippjanajna għalih sfuma fix-xejn. Ġejt infurmat li ċertu Mario Cuomo, li jien qatt ma kont nafu qabel, ħa deċiżjoni li l-Juventus jgħaddu mill-VIP,” qal Fenech.
Kompla jgħidilna li għalih u għall-klabb Juventin Malti kienet priorità li l-Juventus jgħaddu mis-sala tal-wasliet b’mod normali għax dan hu wieħed mill-mumenti sbieħ għal kulmin iħobb lit-tim. Hekk kien ġara sena ilu meta ġew fostna l-Milan.
“F’laqgħa li jien, Reinassance Ltd, il-Pulizija, Mario Bugeja u Patrick Cuschieri kellna ma’ Mario Cuomo smajna mingħandu kif il-partitarji ta’ Milan ħallew b’€46,500 (Lm20,000) ħsarat warajhom u għalhekk ma riedx jissogra li jerġa’ jiġri l-istess. Jien kont pront ħriġtlu polza ta’ assigurazzjoni li tkopri €580,000 (Lm250,000) fi ħsarat tant kemm kont ċert mix-xogħol li t-tim tas-sigurtà tiegħi kien qed jagħmel.
“F’daqqa waħda qam jgħajjat b’mod arroganti quddiem kulħadd. Beda jgħidilna li l-ajruport tiegħu u r-runway tiegħu u li hemm ġew jikkmanda hu biss. Kollha bqajna mbellħin għall-imġiba tiegħu. Irrifjuta darbtejn li jerġa’ jidħol lura biex inkomplu l-laqgħa,” qal Fenech.
L-ikbar dispjaċir għal Fenech jibqa’ l-fatt li l-partitarji Juventini Maltin li kienu se jagħtu merħba kbira lit-tim ta’ Claudio Ranieri mal-wasla tagħhom illejla m’huma se jaraw xejn ħlief il-kowċ u s-sigurtà għaddejja riħ mit-toroq.
Fenech qalilna wkoll li hu personalment ċempel uffiċjali ta’ Birkirkara FC u membri fil-Milan Club Malta li ċaħdu bl-akbar qawwa li s-sena l-oħra saret xi tip ta’ ħsara mal-wasla tat-tim Milanist.
“Mario Cuomo wegħidni li se jibgħatli bil-miktub u jassigurani li minn issa ’l quddiem kulmin jiġi f’pajjiżna ta’ din il-fama li jġib massa ta’ nies lejn l-ajruport jgħaddi biss mill-VIP. S’issa għadni ma rċevejt xejn. Jien nibqa’ skantat biss kif hu qed jgħid li din id-deċiżjoni kienet ittieħdet wara l-wasla tal-Milan u sa ftit tal-jiem ilu, nies bħal Mario Bugeja u Patrick Cuschieri li huma responsabbli mis-sigurtà ta’ l-ajruport, ma sabux problemi li jgħaddu lil Juventus mill-arrivals u ma kinux jafu li sena ilu ttieħdet din id-deċiżjoni.”
Intant il-Juventus mistennija jaslu Malta fid-8.45pm u l-wasla tagħhom se tixxandar dirett fuq Net TV waqt il-programm Replay.