Aħbarijiet | 06 ta’ Jannar 2008 Nr 62

L-ispiżjar irid jilbes ġaggaga bajda u tabella b’ismu

Julia Farrugia
jfarrugia@mediatoday.com.mt

Suppost b’effett immedjat kull spiżjar f’Malta u f’Għawdex irid jilbes ġaggaga bajda u tag għal ta’ l-apposta biex ikun identifikat mill-kumplament tal-pubbliku. Dan bħala parti mill-ftehim tal-Gvern, L-Ispiżerija tal-Għażla Tiegħek.
Iżda minn eżerċizzju li għamlet din il-gazzetta sabet li minn sitt spiżeriji f’irħula differenti li żorna għal għarrieda, waħda biss kienet konformi mal-liġi.
Oriġinarjament il-miżura tal-ġaggaga u t-tag kienet imbuttata madwar sentejn ilu.
Kien il-Kunsill Farmaċewtiku li ħa l-inizjattiva iżda jidher li din il-miżura ma tantx kienet kisbet suċċess.
Issa b’effett minn Ottubru li għadda din id-deċiżjoni ħadet saħħa ta’ liġi u suppost qed tiġi osservata mill-ispiżjara kollha.
Mary Ann Sant Fournier, President tal-Kamra ta’ l-Ispiżjara f’Malta, sostniet li “din ir-regola daħlet fis-seħħ f’Ottubru wara l-ftehim li l-Gvern għamel mal-Kamra u mal-GRTU dwar L-Ispiżerija tal-Għażla Tiegħek kif ukoll fir-regoli dwar il-farmaċija f’Lulju li għadda.”
Sant Fournier qalet li minn żmien għal żmien il-Kamra ta’ l-Ispiżjara tiġbed l-attenzjoni tal-pubbliku u tal-ispiżjara fil-komunità dwar l-importanza li l-ispiżjar jilbes mhux biss il-ġaggaga l-bajda imma wkoll it-tabella li turi x’jismu.
“Dan isir biex kulħadd ikun konformi mal-Liġi u għall-ħarsien tal-pubbliku minn kull abbuż,” saħqet il-President tal-Kamra ta’ l-Ispiżjara.
F’Malta hawn ’il fuq minn 800 spiżjar. B’kollox f’Malta u f’Għawdex hawn 209 spiżeriji.
Skond il-Kamra ta’ l-Ispiżjara suppost isiru spezzjonijiet regolari fl-ispiżeriji fl-irħula u bliet Maltin.
“Safejn nafu aħna l-Awtorità għall-Mediċini tagħmel spezzjonijiet regolari fl-ispiżeriji tal-komunità. L-ispjezzjonijiet isiru dwar aspetti differenti, kemm legali li jirrigwardjaw l-ispiżeriji kif ukoll aspetti li jikkonċernaw l-ispiżjara u l-mediċini,” kompliet Mary Ann Sant Fournier.
Ġimgħat ilu din il-gazzetta bagħtet mistoqsijiet lill-Awtorità għall-Mediċini biex fost l-oħrajn naraw kemm saru spezzjonijiet u kemm spiżeriji nstabu li mhux konformi mal-Liġi. Sa llum iżda l-mistoqsijiet tagħna baqgħu ma tweġbux.