Aħbarijiet | 06 ta’ Jannar 2008 Nr 62

Żewġ siti oħra għal impjanti ta’ riċiklaġġ jintgħażlu wara l-elezzjoni ġenerali

Sabrina Agius
sagius@mediatoday.com.mt

Minkejja li fil-bidu tas-sena li għaddiet inbidlet l-istrateġija għall-immaniġġjar ta’ l-iskart biex minflok sit wieħed ta’riċiklaġġ, dak ta’ Sant’Antin, ikollna tlieta, sa llum iż-żewġ siti l-oħra għadhom ma ntagħżlux.
Dan reġa’ ikkonfermah il-Ministru għall-Ambjent George Pullicino waqt preżentazzjoni tal-progress fl-impjant ta’ Sant’Antin il-bieraħ.
“Għadna qed naraw it-teknoloġiji differenti kif jistgħu joperaw,” spjega Pullicino filwaqt li tenna li qed jitlestew xi rapporti biex ikunu identifikati s-siti.
“Il-fatt li n-nies ikunu jistgħu jaraw l-impjant ta’ Sant’Antnin jopera b’mod sħiħ ifisser ukoll iktar serħan ir-ras għalihom,” stqarr il-Ministru.
Wieħed miż-żewġ siti ġodda se jkun f’Għawdex mentri l-ieħor għandu jinbena iktar qrib ċ-ċentru ta’ Malta biex ikun hemm tqassim ġeografiku aħjar ta’ kif jintrema l-iskart.
Wara l-kontroversja kollha li nqalgħet f’Wied il-Għajn minħabba l-immodernizzar u t-tkabbir ta’ l-impjant eżistenti, possibbilment iż-żewġ siti ġodda jkunu żvelati wara l-elezzjoni ġenerali.
Pullicino kien qed jakkumpanja lill-Prim Ministru Lawrence Gonzi waqt żjara li saret ilbieraħ fl-impjant tar-riċiklaġġ f’Marsaskala fejn qed isir xogħol ta’ mmodernizzar. L-ewwel parti ta’ dan l-impjant għandha tibda topera sa l-aħħar ta’ Jannar bix-xogħol kollu jkun lest sa l-aħħar tas-sena.
Mhux l-istess jista’ jingħad għall-park rikreazzjonali li kellu jsir fl-ispazju li hemm bejn l-impjant ta’ Sant’Antnin u r-Razzett tal-Ħbiberija. Għall-mistoqsija ta’ jekk hemmx data definitiva sa meta se jkun lest dan il-park, Pullicino ikkonferma li għad m’hemmx data fissa.
“Il-park se jitlesta iktar tard din is-sena. Imma s’issa ma nistgħux nagħtu konferma ta’ dati,” qal Pullicino minkejja li ftit qabel l-elezzjonijiet tal-kunsilli lokali ta’ l-2006 kien tħabbar b’tant pompa li kellu jinbena dan il-park.
U biex jittaffa l-uġigħ lir-residenti ta’ Marsaskala s-sena li għaddiet kien hemm anki proposta biex dawn ikollhom sussidju fuq il-kontijiet tad-dawl u l-ilma bħala kumpens għall-fatt li l-impjant stess se jkun qed jiġġenera l-elettriku.
Fuq dan il-punt il-Ministru Pullicino qal lil din il-gazzetta li “il-fondi hemmhekk qegħdin.”
Hu rabat ma’ dak li qal il-Prim Ministru li l-impjant se jiġġenera enerġija biżżejjed biex tforni 1,400 dar b’medja ta’ erba’ persuni.
Matul iż-żjara l-Prim Ministru ħabbar li l-faċilità modernizzata għall-irkupru ta’ materjal riċiklabbli f’Sant Antnin se tibda topera mit-28 ta’ Jannar. Din il-parti ta’ l-impjant se tittratta 36,000 tunnellata ta’ skart riċiklabbli.
L-impjant li jittratta l-iskart organiku li jinħoloq mid-djar għandu jkun jaħdem sa l-aħħar ta’ din is-sena.
L-immodernizzar ta’ l-impjant b’kollox ġie jiswa’ €27 miljun fejn 70 fil-mija minnhom ġew issussidjati minn fondi Ewropej.