Sports | 06 ta’ Jannar 2008 Nr 62

Il-Juventus tagħna u magħna…issa ngawdu!

Il-Juventus f’Malta. Kienet ix-xewqa ta’ ħafna li wara 10 snin il-ħolma li jerġgħu jaraw wieħed mill-akbar klabbs fix-xena mondjali tal-futbol f’pajjiżna ssir realtà. U proprju mil-lejla din il-ħolma tista’ tibda titgawda mill-eluf kbar ta’ Juventini Maltin u anki dawk li mhumiex meta dirett minn Turin fit-8.45pm l-ajruplan jinżel fl-ajruport ta’ Malta.
L-istess kien ġara ftit aktar minn tliet snin meta dakinhar, l-Avukat Michael Sciriha kien ġie elett President tal-Juventus Club Vero Amore Malta. Il-membri kienu raw fih orizzonti kbar u l-fiduċja li tawh sarrafha fil-wegħdi mwettqa li hu għamel, qed jagħmel u se jibqa’ jagħmel sakemm idum jokkupa dan is-siġġu ta’ l-ikbar klabb Juventin li hawn fid-dinja.
B’aktar minn 900 membru attwali, Michael Sciriha jmexxi klabb li fi kliem id-diriġenza f’Turin hu l-aktar organizzat u professjonali minn kull lat. Il-ħbiberiji li kompla żied f’dawn l-aħħar snin ma’ nies tat-tip ta’ Jean Claude Blanc, Giovanni Cobolli Gigli u John El Kann komplew kabbru isem pajjiżna fl-Italja u personalment inħoss li hu personali għandu ħafna mil-mertu l-għaliex minn tant pajjiżi, Juventus għażlu Malta.
Hu bniedem kwiet u kalm ta’ skola u intelliġenza kbira. Kemm ili nafu tgħallimt ħafna mingħandu u f’ċerti sitwazzjonijiet f’ħajti qistu dejjem bħala t-tieni missier tiegħi. Il-karriera u l-ħajja tiegħi fil-futur tista’ tkun qed torbot ħafna fuq din il-persuna. Konvint ħafna li fil-futur, il-kapaċitajiet tiegħi u s-saħħa u l-integrità li għandu Michael se jwassluni fejn ta’ tifel żgħir dejjem ħlomt.
Iltqajt miegħu f’ġenn sħiħ f’ġimgħa mill-aktar impenjattiva għalih u għall-klabb li jmexxi. Il-lejl ta’ qabel kien għadu kemm wasal mill-Italja u filgħaxija stess ried imexxi l-aħħar laqgħa ta’ l-Eżekuttiv tal-klabb qabel il-wasla fostna tar-Reġina tal-futbol Taljan.
F’din is-siegħa, Michael ikellimni fuq kulma laqtu f’ħajtu f’dawn l-aħħar snin fejn tidħol il-logħba tal-futbol. Ippruvajt ukoll noħodlu minn moħħu x’se jkun il-futur tiegħu hekk kif diċeriji persistenti fil-pajjiż li hu ma ċaħadx jibqgħu jsostnu li se jħalli kollox għall-politika. B’sieq fuq sieq, idejh marbuta jistenna l-kafè jibred ftit, Michael jgħidli li hu bniedem tal-ġabra u l-familja imma l-isport jokkupa parti kbira minn ħajtu wkoll.
“Jien bniedem li għandi id-delizzji tiegħi bħal kulħadd imma għandi wkoll imħabba kbira lejn il-familja u lejn pajjiżi. Nemmen li jien kalm u prudenti ħafna u nħobb nagħti t-tolleranza assoluta lejn dawk in-nies li naħdem ħafna magħhom f’ħajti. “Għandi simpatija kbira lejn dak il-bniedem li jkun qed jgħaddi min xi tbatija. Nieħu gost naqra ħafna fuq diversi suġġetti differenti b’mod speċjali dawk li jittrattaw l-ekonomija, il-liġi u l-isport. Bħalma taf int, nieħu kull opportunità biex nagħti l-għajnuna tiegħi f’avvenimenti ta’ benefiċjenza.
“Meta professjoni bħal tiegħi toħodha bis-serjetà bilfors li se tokkupalek ħafna ħin. Iżda nipprova nkun kemm jista’ jkun maniġerjali fl-allokazzjoni tal-ħin tiegħi biex b’hekk noħloq dak l-ispazju li nkun nista’ niddedika għall-isport.”
Nitkellem miegħu fuq iż-żmien li ilu midħla sew tal-klabb Juventin Malti. Jirrakkuntali kif kien sab ruħu jokkupa s-siġġu ta’ President. 
“Jien kont ta’ spiss nipparteċipa fl-attivitajiet tal-Juventus Club Vero Amore u minn dejjem kelli relazzjonijiet tajbin mal-Membri ta’ l-Ezekuttiv kif ukoll mal-membri ta’ l-istess klabb. Barra minhekk, qabel ma nħtart President, kont ukoll Konsulent Legali ta’ l-istess klabb.
“Darba fost l-oħrajn kien ġie jkellimni Brian Borg li kien u għadu l-Viċi President tal-klabb. Kienet is-sena 2004 meta tard filgħaxija sibtu fl-uffiċju legali tiegħi. Kien hu li rnexxielu jikkonvincini li għandi kontribut x’nagħti u għalhekk aċċettajt li nikkontesta l-elezzjoni għall-President. L-imħabba kbira li għandi lejn it-tim Juventin ridt insarrafa f’xogħol għall-membru għax hekk jistħoqqilhom.”
S’issa ilu aktar minn tliet snin fil-kariga. Michael ifaħħar il-ħidma li għamlu n-nies li ġew qablu fil-Kumitat li llum jgħodd aktar minn 30 sena.
“Il-Presidenti ta’ qabli għamlu l-pedament tal-klabb u jien bħala President komplejt nibni fuq dak li sibt. Mill-ewwel ġranet tiegħi ridt li nagħti lill-klabb aktar u bdejt stil ta’ azjenda li kull Juventin f’Malta jħoss li qiegħed f’daru meta jkun hemm.”
Ma’ Michael nitkellem fuq is-soċjetà Juventina inġenerali. Konxju li Turin u Vinovo għalih saru dar oħra nitolbu jagħtini l-opinjoni tiegħu għaliex jaħseb li l-Juventus għandhom daqshekk mibegħda fid-dinja tal-futbol. 
“Hi ħaġa sempliċi ħafna. Il-Juventus dejjem kienu tim rebbieħ u naturalment ir-rebħ iġib miegħu għira u antipatija. Il-Juve saru ħafna aktar simpatiċi minn mindu niżlu Serie B. Il-problema tal-Juventus kienet u tibqa’ li s-soċjetà dejjem kienet pass ’il quddiem mit-timijiet l-oħra.”
Inkellmu fuq l-istorja ta’ Calciopoli li kkundannat lil Juventus Serie B. Michael hu wieħed minn dawk li jemmen li kollox kien maħdum bizzilla biex min kien is-surmast ta’ l-orkestra, jivvendika ruħu bl-akbar mod possibbli minn tim li m’għandux grazzja miegħu. 
“Aktar ma jgħaddi żmien, l-istorja ta’ Calciopoli qed tirriżulta li kienet montatura mill-aqwa. Biżżejjed tħares lejn l-istejjer ta’ ċerti kumpaniji tat-telefons fl-Italja kif ukoll tara id-depożizzjonijiet ta’ xhieda oħra fi proċessi oħra u mill-ewwel tinduna li din kienet xi ħaġa ivvintata minn nies li kienu nvoluti fil-futbol u fit-telefones.
“Jien m’għandix dubju li meta jibdew il-proċessi fil-Qrati tal-Ġustizzja, il-konklużjonijiet se jkunu differenti għax dak li smajna u qrajna kienu biċċiet minn stejjer ferm akbar.
“Il-proċessi ta’ Calciopoli ma kienu xejn għajr farsa fejn biex tiddefendi ruħek kellek bejn 10 jew 15-il minuta u d-difiża ma kellhiex id-dritt itella’ dokumenti jew xhieda. F’dan il-kuntest, tajjeb wieħed isemmi li f’dawn il-proċessi n-nies kollha li kellhom xi inkarigu kienu kollha persuni bi grudge kbira kontra l-Juve. Nistennew u naraw...”
Michael ikellimni fuq it-trankwillità li tirrenja f’Vinovo u jiddiskrivili wieħed mill-ħbieb personali tiegħu, Jean Claude Blanc. Jgħidli kemm l-affarijiet huma ferm differenti minn ftit taż-żmien ilu.
“Jean Claude hu bniedem umli u kordjali. Hu raġel simpatiku u serju u ta’ integrità kbira. Għandu kapaċitajiet maniġerjali minbarra li r-rispett tiegħu lejn is-Supporters Clubs imxerrda ma’ l-Italja u mad-dinja hu bla limitu. Qed imexxi s-soċjetà Juventina bi trasparenza u apertura anki man-nies li ma jagħmlux parti mill-organizzazzjoni ta’ l-istess soċjetà.
“Jean Claude Blanc hu wieħed minn dawk li dejjem ta widen lill-klabb Malti u dejjem sibnieh ta’ għajnuna f’kollox. Lil Malta jħobbha ħafna. Bih fit-tmun, il-Juventus saret aktar soċjetà li tagħti eżempju ta’ komportament etiku mill-ogħla. Il-miri tal-Juventus huma li din is-sena jaslu fiż-żona Champions League u s-sena d-dieħla jagħmlu dik il-qabża fil-kwalità li biha jistgħu jikkompetu fiċ-Champions League u fil-kampjonat.”
Kienu ħafna dawk id-dilettanti xettiċi bil-ħatra ta’ Claudio Ranieri bħala kowċ. L-Avukat stess jgħidli li anki hu kien wieħed minn dawk li kellu d-dubji tiegħu fuq din l-għażla iżda jinsab sorpriż bil-kapaċitajiet ta’ din il-persuna.  
“Ranieri kien l-akbar sorpriża u ssorprenda lil kulħadd bil-mod ta’ kif qiegħed jibni t-tim u għall-komportament ta’ rġulija tiegħu.
“Rigward l-akkwisti l-ġodda wieħed jista’ jgħid li l-unika problema hu Almiron. Il-bqija kollox qed jitkellem waħdu għax l-akkwisti l-oħra qegħdin jagħtu l-kontribut tagħhom għall-pożizzjoni tajba fil-klassifika li l-Juve jinsabu fil-preżent.”
Il-Juventus f’Malta. Hi okkażjoni storika għal pajjiżna li hu kellu sehem kbir fiha. Jgħidli li mill-ewwel laqgħa tiegħu ma’ Blanc kien talbu biex b’mod regolari jibda jibgħat il-plejers Bianconeri.  
“L-aspett kummerċjali tal-mawra tal-Juve f’Malta jappartjeni lill-kumpanija Renaissance imexxija minn Dr.Anton Tabone u Amabile Zammit u għalhekk mhux fil-kompitu tiegħi li nitkellem fuq dan l-aspett. Nistqarr li fl-ewwel laqgħa li kelli ma’ Blanc mill-ewwel kont tlabtu biex jara kif se nibdew inġibu l-plejers Malta biex nissodisfaw lill-partitarji Maltin. Hu fehem iċ-ċirkostanzi speċjali ta’ Malta u l-frott se nibdew ingawduh mil-lum. 
“Il-Juve għażlu l-Malta għax jafu bl-appoġġ kbir u qawwi li għandhom. Kellhom opinjoni tajba tal-faċilitajiet li hawn fil-pajjiż. Biss jien nemmen li ħadu wkoll inkonsiderazzjoni s-serjetà fit-tmexxija tal-klabb Malti.”
Nistaqsih jekk din il-mawra tal-Juve f’pajjiżna tkunx l-ewwel waħda minn sensiela ta’ proġetti fit-tul li s-soċjetà se torganizza f’pajjiżna. 
“Jekk hux l-ewwel jew l-aħħar proġett li l-Juventus għandhom f’Malta jiddependi minnhom. Iżda jien nemmen li l-Juventus illum xeħtu għajnejhom fuq it-tajjeb li joffri pajjiżna f’diversi setturi ekonomiċi. Konvint li għall-futur il-Juventus se narawhom involuti aktar f’Malta jekk kulmin se jkun involut f’din iż-żjara jagħti servizz professjonali b’komportament edukat.”
Inkellmu aktar fuq il-ħajja professjonali tiegħu hekk kif xnigħat persistenti qed ikomplu jidwu li se jibda ħajja ġdida fil-politika. Nistaqsih fuq dan kollu. 
“Fil-preżent Michael Sciriha hu biss il-President tal-Juventus Club Malta u m’għandu x’jaqsam xejn mal-politika. Meta u jekk ikun il-każ, wieħed jiddeċiedi fl-aħjar interess ta’ kulħadd. Imma rrid ngħid ukoll li jien senior partner fil-kumpanija ta’ l-Avukati, SAGA. Din hi konsiderazzjoni oħra kbira li rrid inżomm f’moħħi qabel ma nieħu xi pass importanti.”
Marsaxlokk, Valletta u issa anki Rabat Ajax. Għalkemm ma jgħidx b’mod dirett, Michael kważi jikkonferma li kollox hu diġà konfermat. Is-sena d-dieħla l-President ta’ Rabat Ajax se jkun hu.
“Kif diġà stqarrejt jien minn dejjem kelli simpatija kbira lejn ir-raħal Rabti u lejn it-tim tagħhom. Jien diġà Konsulent Legali tagħhom. Fil-preżent huma għandhom President ta’ ħila minbarra li hu ħabib kbir tiegħi. Iżda jekk niġi mitlub l-għajnuna jien se nagħtiha bl-aħjar mod possibbli.
“Ir-rabta li għandi mal-Valletta FC hi biss għax ħija Victor hu l-President. Però jien dejjem ħdimt fil-Belt u għalhekk xi ftit jew wisq il-Beltin saru parti minn ħajti u magħhom ma jonqosx it-tim tal-futbol.
“Rigward Marsaxlokk nista’ ngħid li hu r-raħal li ngħix fih. Għandi ħafna ħbieb Xlukkajri fosthom dawk preżenti li qed imexxu t-tim tal-futbol. Għandi u se jibqa’ jkolli r-rispett li jixraq lejn dan it-tim.”
Michael Sciriha tal-futur. Jgħidli li jrid jibqa’ jżomm dak li qed jagħmel fil-preżent b’differenza li jgħin ftit aktar lil ibnu Lucio jipprova jilħaq fejn laħaq hu. 
“Fil-futur narani involut aktar fl-isport u fil-benefiċjenza. Nixtieq nibqa’ naħdem ta’ avukat iżda sa dak iż-żmien il-probbabiltà tkun li nkun qed nagħti aktar għajnuna lil Lucio. Nispera li sa 10 snin oħra Lucio jkun avvjat sew fil-professjoni legali.”
Michael jirringrazzja lil dawk li fil-ħajja ta’ kuljum huma l-aktar viċin tiegħu. 
“Meta nagħlaq għajneja u naħseb fuq il-professjoni tiegħi u l-Juventus Club Malta ma nistax ma nsemmix lill-partners tiegħi John Attard Montalto u Patrick Galea. Magħhom ma nistax ma nsemmix lil Franco Galea li hu l-id il-leminija tiegħi.
“Jekk niftakar fil-klabb ma nistax ma nirringrazzjax lill-membri sħabi kollha ta’ l-Eżekuttiv għax-xogħol u l-għajnuna li jagħtuni kontinwament.” 
Jgħidli biex ma nfallix mil-laqgħa li kellha tibda daqs siegħa oħra. Għalih dejjem kienet priorità li l-15-il persuna ta’ l-Eżekuttiv ikunu preżenti għal-laqgħa tal-Kumitat. Din ta’ tlett ijiem qabel il-wassla tal-Bianconeri kienet importanti wisq. Isellimli u jħallini bil-kliem,
“Il-Juventus tagħna u magħna… issa ngawdu!!!”