Ittri | 06 ta’ Jannar 2008 Nr 62

Konferma tal-perikli fil-Pakistan

Minn David Pisani,
Żminijietna – Leħen ix-Xellug
Valletta

L-aħħar ġrajjiet li seħħew fil-Pakistan bil-qtil ta’ Benazir Bhutto jikkonfermaw il-perikli u n-nuqqas ta’ stabbiltà li teżisti fil-pajjiż li hi karatterizzata minn despotiżmu militari, anarkija u manuvrar imperjalista.
Kulħadd jaqbel li l-qtil ta’ Benazir Bhutto hu traġedja, anki dawk li ma’ jaqblux mal-politika tagħha. Bhutto kienet qed timxi fuq il-passi ta’ missierha lejn politika soċjalista u demokratika.
Il-qtil ta’ Bhutto jikkonferma l-perikli tal-fanatiżmu reliġjuż iżda jirrifletti wkoll il-fatt li ’l hekk imsejħa ‘gwerra kontra t-terrur’ tal-Gvern Amerikan u l-alleati tiegħu qed isservi biex ikun hemm iktar estremiżmu.
Żminijietna – Leħen ix-Xellug temmen li l-politika imperjalista’ ta’ dan it-tip għandha ħafna x’taħti għall-mewt ta’ Bhutto. Il-Pakistan għandu bżonn oppożizzjoni ta’ vera għall-partiti politiċi korrotti u għall-fanatiżmu reliġjuż. Din l-oppożizzjoni għandha tkun ħielsa mill-manuvrar imperjalista.