Ittri | 06 ta’ Jannar 2008 Nr 62

Il-Pakistan u l-assassinji tal-mexxejja tiegħu

Minn Eddie Attard,
Gżira

Il-Pakistan reġa’ kien fl-aħbarijiet wara l-assassinju ta’ Benazir Bhutto. L-aħħar darba li kien fl-aħbarijiet dwar assassinju kien 19-il sena ilu meta nqatel Zia ul-Haq. Snin qabel kien assassinat l-ewwel mexxej ta’ dan il-pajjiż, Ali Khan Liaquat.
Bħala nazzjon il-Pakistan ilu biss 60 sena, b’Ali Khan Liaquat bħala l-ewwel Prim Ministru. Imwieled fl-Indja, fl-1 ta’ Ottubru 1895, Ali Khan Liaquat ħa l-ewwel edukazzjoni fl-Indja u wara ggradwa bħala avukat mill-Exeter College ta’ Oxford. Meta fl-1923 daħal fil-ħajja politika, il-komunità Musulmana fil-Pakistan dehret sodisfatta bih u wara t-twaqqif ta’ l-istat tal-Pakistan fl-1947, Liaquat inħatar l-ewwel prim ministru. Fl-istess żmien Mohammed Ali Jinnah inħatar president ta’ dan l-istat ġdid Musulman.
Wara l-mewt tal-president, Liaquat inħatar qaid-i-millet, jew aħjar mexxej tal-pajjiż. Imma minkejja l-popolarità ta’ dan il-mexxej il-konflitt li kien hemm bejn l-Indja u l-Pakistan wassal għall-assassinju tiegħu minn fanatiċi Pakistani li riedu l-gwerra kontra l-Indja. Liaquat inqatel fis-16 ta’ Ottubru 1951, f’Rawalpindi, il-Pakistan.
It-tieni assassinju wasal snin wara.
Għad li mhux kulħadd jaqbel li l-mewt tal-President Zia ul-Haq kien assassinju, ħafna jsostnu li l-ajruplan li kien fuqu ma waqax b’xi kumbinazzjoni jew ħsara, imma b’sabutaġġ.
Mohammad Zia ul-Haq twieled fit-12 ta’ Awissu 1924, f’Jullunduer, il-Punjab li llum huwa territorju Indjan. Fl-1945 sar fizzjal wara li attenda l-Akkademja Militari ta’ l-Indja u matul it-tieni gwerra dinjija ġġieled fil-Lbiċ ta’ l-Asja flimkien mal-qawwiet ta’ l-alleati.
Fl-1972 Zia nħatar ġeneral maġġur u kien ippresieda l-qorti marzjali meta diversi fizzjali ta’ l-armata u tal-qawwa ta’ l-ajru tal-Pakistan kienu akkużati li riedu jneħħu lill-Prim Ministru Zulfikar Ali Bhutto (missier Benazir Bhutto). Bhutto kien ta promozzjoni lil Zia u fl-1976 ħatru bħala kmandant ta’ l-armata minkejja li Zia ma kienx jikkwalifika fir-rigward ta’ anzjanità.
Fil-5 ta’ Lulju 1977, Zia mexxa kolp ta’ stat biex tneħħa Bhutto u wara li fl-1978 il-President Fazal Elahi Chaudhry irriżenja, Zia ħa l-kariga ta’ President tal-Pakistan. Biex ikun eliminat Bhutto fl-1978 Zia akkużah b’attentat ta’ qtil u l-kundanna ta’ l-eks-prim ministru kienet dik tal-mewt, bl-esekuzzjoni ssir fl-4 ta’ April 1979. Dan sar minkejja talbiet internazzjonali biex il-kundanna tinbidel.
Sadanittant Zia ssospenda l-partiti politiċi, ipprojbixxa l-istrajkijiet, impona ċ-ċensura fuq l-Istampa u daħħal il-liġi marzjali. Imbagħad meta deher li seta’ jkun hemm invażjoni Sovjetika fil-Pakistan, Zia aċċetta l-għajnuna mill-Istati Uniti.
Zia miet wara li l-ajruplan li kien qiegħed jivvjaġġa fuqu waqa’ fis-17 ta’ Awissu 1988. Dakinhar il-President kellu miegħu lill-Ġeneral Akhtar Abdul Rahan Khan, li jintqal li kellu jkun il-mexxej tal-Pakistan warajh. Kien hemm ukoll l-Ambaxxatur Amerikan, Arnold Raphel, u l-Brigadier General Herbert Wassen, l-attache’ Amerikan tad-Difiża f’Islamabad. Mietu wkoll tmien ġenerali u membri ta’ l-ekwipaġġ. B’kollox tilfu ħajjithom 31 ruħ, jiġifieri dawk kollha li kienu qed jivvjaġġaw fuq dan l-ajruplan.
Skond ma ntqal fir-rapport ta’ l-inkjesta wara l-waqgħa ta’ l-ajruplan, il-kaġun ta’ din id-disgrazzja kien l-avvelenament tal-piloti ta’ l-ajruplan permezz ta’ gas velenuż. Jintqal ukoll li dan il-gas seta’ kien f’thermos, f’xi pakkett, jew reċipjent ieħor. Madankollu, dan ma setax ikun konfermat għax ma saret l-ebda awtopsja fuq dak li sabu mill-katavri tal-vittmi.
Zia kellu ħafna għedewwa u fuq quddiemnett kien hemm il-familja Bhutto għax minbarra dak li diġà ntqal, wara l-esekuzzjoni ta’ l-eks Prim Ministru Bhutto, il-partit tagħhom ġie pprojbit u l-armla ta’ Bhutto u bintu Benazir kienu mitfugħa l-ħabs. Sadanittant, Shah Nawaz u Mir Murtaza, ulied l-eks prim ministru, kellhom kundanni ta’ priġunerija, imma dawn laħqu ħarbu mill-pajjiż u waqqfu grupp terroristiku biex jeħduha kontra Zia.
Minkejja dan seta’ kien hemm ħaddieħor li wettaq l-assassinju ta’ Zia u tissemma l-organizzazzjoni sigrieta tal-Pulizija Afgana, il-KHAD, li kellha taħriġ mill-KGB. Zia kien appoġġa lill-Mujahideen li kienu qed jiġġieldu fl-Afganistan kontra l-ħakma Sovjetika.
Kien hemm ukoll l-għadu l-ieħor tal-Pakistan, jiġifieri l-Indja, f’dak iż-żmien immexxija minn Rajiv Gandhi. Is-Sikhi kienu għedewwa kbar ta’ dan il-mexxej u jintqal li Zia kemm-il darba kien akkużat li ta l-armi u kenn lill-grupp terroristiku tas-Sikhi. Jissemma wkoll li seta’ kien Akhtar Abdul Rahan Khan fil-mira u Zia nqatel miegħu.