Aħbarijiet | 23 ta’ Diċembru 2007 Nr 60

Munich ġie u mar u l-pulizija ma tħallsux

Julia Farrugia
jfarrugia@mediatoday.com.mt

Pulizija li kważi tliet snin ilu ħadmu xogħol fuq il-film Munich għadhom s’issa ma tħallsux għas-sigħat li għamlu. Il-pulizija għandhom jieħdu l-flus mill-Korp tal-Pulizija.
Munich beda jinħadem fl-2005 u ħareġ fiċ-ċinema aktar minn sena ilu.
Partijiet mill-film inħadmu f’irħula differenti Maltin fosthom f’Marsaxlokk, fir-Rabat, f’Tas-Sliema, f’Buġibba u fil-Belt. Għal dan il-għan kienet intalbet l-għajnuna tal-Korp biex pulizija jagħlqu numru ta’ toroq fejn kien qed isir il-ġbid tax-xeni u joqogħdu għassa fl-istess inħawi.
Iżda minkejja li kważi għaddew tliet snin minn dan ix-xogħol, sa llum il-pulizija għadhom ma rċevewx il-ħlas dovut lilhom.
Dawn mhux l-uniċi kontijiet pendenti li għandu l-Korp ma’ membri tiegħu.
Illum hi nfurmata li għad hemm numru ta’ pulizija li għadhom s’issa ma tħallsux ta’ xogħol żejjed li għamlu fis-sajf ta’ sena ilu fi stabbilimenti ewlenin tad-divertiment.
Sidien ta’ dawn il-postijiet kummerċjali sostnew ma’ din il-gazzetta li ma jistgħux jifhmu x’qed iwassal biex il-flus qed idumu biex jaslu għand il-Pulizija. Dan għaliex kif ġew ir-regolamenti s-sidien qed ikollhom iħallsu minn qabel il-flus dovuti lill-Korp għall-assistenza li joffri f’avvenimenti ta’ divertiment.
Hemm ħlasijiet oħra li s’issa għadhom ma ngħatawx lill-pulizija, fosthom ta’ xogħol li sar f’festi pubbliċi. Każ tipiku hu xogħol li sar fl-ewwel tas-sena li waslet biex tintemm.