Aħbarijiet | 23 ta’ Diċembru 2007 Nr 60

Edwin Grech jitlob investigazzjoni ġdida

Julia Farrugia

Il-Professur Edwin Grech, missier Karin li nqatlet b’ittra bomba bħal nhar il-Ġimgħa 30 sena ilu, qed jitlob li tinfetaħ investigazzjoni ġdida dwar il-każ ta’ bintu.
F’intervista ma’ din il-gazzetta Edwin Grech jgħid li m’għandux fiduċja fl-investigazzjoni li saret s’issa. “Qed nitlob investigazzjoni ġdida u li ssir bis-serjetà,” isostni Grech.
F’dik li tista’ tkun deskritta bħala żvolta ġdida f’dan il-każ missier Karin Grech jistqarr ma’ din il-gazzetta li hu jista’ jipprova kif “l-investigazzjoni li saret fl-imgħoddi kienet zoppa. Jien konvint li xi ħadd qed iżomm il-ġustizzja milli ssir,” ikompli Edwin Grech.
Jumejn biss ’l bogħod mill-Milied, Edwin Grech jitkellem dwar il-weġgħa tal-familja tiegħu u dwar kif wara d-delitt il-familja tiegħu tilfet l-ispirtu veru tal-Milied.
“Ma nistgħux nidħlu fl-ispirtu tal-Milied. Għalina l-Milied ifisser il-qtil ta’ bintna.”
Il-qtil faħxi taż-żagħżugħa Karin permezz ta’ ittra bomba li kienet indirizzata lil missierha għadu tebgħa fuq il-kuxjenza ta’ dan il-pajjiż. Il-qtil kien seħħ fl-eqqel tal-ġlieda mat-tobba fi żmien il-Gvern Laburista tas-Sebgħinijiet meta t-tabib Edwin Grech injora d-direttiva ta’ strajk li ngħatat lit-tobba mill-Assoċjazzjoni Medika.

Ara l-intervista