Ittri | 16 ta’ Diċembru 2007 Nr 59

Artali u knejjes

Minn Edward Torpiano,
Floriana

Nixtieq ngħaddi kumment dwar frażi li Reno Calleja qal lil Julia Farrugia fl-intervista li ġġib l-isem, ‘Il-‘ktieb l-aħmar ta’ Reno’ (ILLUM, 9 ta’ Diċembru, 2007) fejn l-imsemmi intervistat qal il-kliem: “Skandalizzajt ruħi li d-Deputat Nazzjonalista Jeffrey Pullicino Orlando tela’ fuq l-artal biex jilħaq l-iskopijiet politiċi tiegħu. Issa jien lil Jeffrey
għandi rispett kbir lejh. Imma din inaċċettabbli …”
Infakkar fit-28 ta’ Settembru 1984 meta Reno Calleja kien Membru Parlamentari Soċjalista Mintoffjan u meta wara li Karmenu Mifsud Bonnici qal lill-ħaddiema tat-Tarzna: “Ħuti ta’ l-8th Army. Kull armata jkollha grupp ta’ l-aħjar suldati fir-riserva tagħha u intom ngħoddukom bħala l-aħjar riserva tagħha.”
Wara li semgħu dan id-diskors xewwiexi, ġew ikissru tabernaklu imqaddes fil-Kurja Arċiveskovali.
Dwar dan baqa’ qatt ma skandalizza ruħu Reno Calleja?