L-Air Malta u l-bdoti mili ’l bogħod

L-Air Malta u l-Assoċjazzjoni tal-bdoti (Alpa) għadhom ’il bogħod ħafna milli jaslu għal qbil fuq in-negozjati li qed isiru għall-ftehim kollettiv ġdid.
Din il-ġimgħa l-Air Malta, f’mossa li kienet deskritta bħala “sorpriża” minn xi bdoti, iddikjarat uffiċjalment li ż-żewg naħat ma qablux fuq il-ftehim kollettiv u għalhekk kienet se tieħu l-każ għall-konċiljazzjoni (Compulsory Private Conciliation).
Id-deċiżjoni tal-management tal-linja nazzjonali ta’ l-ajru jidher li ħasdet lill-bdoti.
Intant, kemm l-Air Malta kif ukoll l-Alpa naqqsu milli jikkummentaw dwar in-nuqqas ta’ qbil bejniethom.
Illum hi infurmata li l-pożizzjonijiet rispettivi taż-żewġ naħat dwar il-pakkett finanzjarju u l-kundizzjonijiet tax-xogħol huma “mili ’l bogħod.”
Fil-jiem li ġejjin il-bdoti mistennija jagħtu risposta uffiċjali lill-Air Malta jekk hux se jaċċettaw l-proposta tal-kumpanija.
Mistoqsi minn Illum dwar in-negozjati ma’ l-unions l-oħra, iċ-Chairman ta’ l-Air Malta Lawrence Zammit qalilna biss li n-negozjati “mexjin” mingħajr ma ta iktar dettalji.