Ħelikopter fil-post ħażin

Minn M. Spiteri,
Tarxien
L-isptar il-ġdid tassew hu meravilja. M’għandu x’jaqsam xejn ma’ dak li drajna bih San Luqa. Impressjonajt ruħi bl-indafa u l-arja li fih il-post, kważi bilkemm tinduna li tinsab l-isptar li kieku ma tarax it-tbatija tal-pazjenti quddiem għajnejk.
Ngħid is-sewwa l-flus li nfaqna fih tallinqas kienu investiti f’apparat ta’ l-aħjar kwalità. Nispera biss li l-istaff, il-pazjenti u l-qraba tagħhom jibżgħu għalih biex ma nispiċċawx b’xi mandra oħra.
Madankollu nħoss li s-sit magħżul fejn jinżel il-ħelikopter mhux addattat. Meta mort inżur lil xi ħadd inzertajt il-ħelikopter nieżel. Il-ħoss li jagħmel hu tremend apparti l-fatt li jekk rajt sew anki twaqqfu xi karozzi sakemm tlestiet l-operazzjoni ta’ sbark.
Kien ikun iktar addattat li kieku l-ħelikopter kien jinżel fuq il-bejt ta’ l-isptar u mhux f’żona li maġenba jgħaddu n-nies.
Mill-bqija ngħid prosit lil min ħadem biex itina sptar ta’ l-ogħla kwalità.