Le għaċ-ċirklu bl-annimali

Minn Ray Schembri,
Mill-Band Subculture,
Tarxien

Qed nikteb biex nuri d-diżapprovazzjoni tiegħi u ta’ ħafna għaċ-ċirklu li ġej Malta u li juża l-annimali bħala attrazzjoni u divertiment.
Donnha li se terġa’ tidħol drawwa li kif joqrob il-Milied dawn it-tip ta’ ċirkli jsibu lil xi promotur Malti li jġibhom hawn fostna.
Apparti li l-annimali li jiġu mhux se jkunu fl-ambjent naturali tagħhom dawn jiġu abbużati psikoloġikament u fiżikament biex jobdu u jitgħallmu jagħmlu logħob u affarijiet li normalment ma jagħmlux.
B’dispjaċir ninnota li l-awtoritajiet ipaċpċu ħafna dwar id-drittijiet ta’ l-annimali iżda mbagħad iħallu li jinħarġu l-permessi għal dan l-abbuż.
Il-media wkoll donnha tbigħ ruħha għall-flus li ddaħħal mir-riklami. Inutli li jagħtuna l-ispazju biex nuru d-diżapprovazzjoni tagħna għal dawn it-tip ta’ ċirkli, li f’ħafna każi l-media wkoll ma taqbilx magħhom, iżda mbagħad jikkontradixxu kollox billi jaċċettaw ir-reklami tagħhom! Ma nistax nifhem.