Koffi Annan aċċetta li jiġi Malta

Julia Farrugia
Koffi Annan, l-eks Segretarju tal-Ġnus Magħquda, mistenni jiġi Malta matul is-sena d-dieħla.
Illum tista’ tikkonferma li Koffi Annan se jiġi Malta biex jindirizza lill-Kumitat Parlamentari għall-Affarijiet Barranin u Ewropej fuq stedina li saritlu mill-istess kumitat.
Jason Azzopardi, Chairman tal-Kumitat Parlamentari, ikkonferma li hu personalment għamel talba lil Koffi Annan biex jiġi Malta.
“Koffi Annan aċċetta l-istedina biex jiġi Malta. Mill-Uffiċċju ta’ Koffi Annan qalulna li qed jistennew l-aġenda uffiċjali tas-sena d-dieħla biex jagħtuna d-data ta’ meta ġej,” qal Azzopardi.
Annan kien Segretarju tal-Ġnus Magħquda bejn l-1 ta’ Jannar 1997 u l-1 ta’ Jannar 2007 u fl-2001 irċieva l-Premju Nobel għall-Paċi.