Meta jaqa’ ċ-ċpar

Franica Pulis
fpulis@mediatoday.com.mt
Iċ-ċpar qawwi li ħakem il-gżejjer Maltin bejn il-Ġimgħa u lbieraħ għandu jbatti tul in-nofs ta’ nhar ta’ dalgħodu.
Skond Mario Abdilla mill-Uffiċċju Meteoroloġiku l-fenomenu ta’ “sħab ma’ l-art” seħħ għax f’dawn l-aħħar jumejn għaddiet fuq Malta arja sħuna mill-Afrika u sabet kundizzjonijiet tajba biex toħloq ċpar ma jaqta’ xejn.
“L-arja sħuna resqet minn fuq il-baħar lejn Malta u peress li sabet riħ ħafif, arja umduża u l-art kiesħa kienet faċli biex jifforma ċ-ċpar,” spjega Abdilla.
Hu qal li dawn il-jumejn ta’ ċpar ma kinux normali minħabba li l-viżibbiltà baqgħet ħażina wara l-ewwel lejl.
Kawża taċ-ċpar, għalkemm l-ajruport qatt ma ngħalaq, kien hemm ukoll xi dewmien f’uħud mit-titjiriet minħabba l-kundizzjoni ħażina tal-viżibbiltà bejn il-Ġimgħa u s-Sibt. Dan sostnietu kelliema għall-Ajruport Internazzjonali ta’ Malta. Uħud mil-linji ta’ l-ajru, fosthom l-AirMalta, kellhom jieqfu Katanja u Palermo filwaqt li r-Ryan Air ħassar xi titjiriet u żied waħda s-Sibt.