Il-Fondazzjoni Equal Partners

Għaliex il-Gvern qed jirrifjuta li jgħin familji ta’ persuni b’diżabbiltà?

Julia Farrugia
jfarrugia@mediatoday.com.mt

Anabel Mifsud, Manager Eżekuttiv tal-Fondazzjoni Equal Partners, tistaqsi kif il-Gvern għal aktar minn darba irrifjuta li joffri wens lill-familji ta’ persuni b’diżabbiltà.
F’kummenti lil Illum Mifsud tispjega li bħalissa l-Fondazzjoni qed toffri għajnuna lil 180 familja, figura li għoliet b’60 fil-mija f’dawn l-aħħar tliet snin.
Anabel Mifsud tgħid li l-Equal Partners talbet kemm-il darba l-għajnuna finanzjarja ta’ l-Awtoritajiet. Madankollu sa llum ħadd ma taha widen.
“L-Equal Partners twaqqfet fl-1999 u għal dawn l-aħħar tmien snin il-Fondazzjoni appellat lill-Gvern biex jirrevedi s-sistema ta’ kif jalloka l-fondi f’dan il-qasam. Sa llum l-Equal Partners hi waħda mill-organizzazzjonijiet li għadha mhix qed tgawdi minn fondi ta’ l-istat,” tispjega Mifsud.
“Il-flus dejjem qed jingħataw lil ftit għaqdiet non-governattivi – hu status quo li għal snin sħaħ qatt ma kien mittiefes,” tinsisti l-Manager Eżekuttiv ta’ l-Equal Partners.
“Onestament nittama li ma spiċċajniex f’sitwazzjoni li “komdi ma jinteressaniex” u li mhux qed nagħlqu għajnejna għal din is-sitwazzjoni inġusta,” qalet Anabel Mifsud.
“Temmu din id-diskriminazzjoni u agħtu l-appoġġ lil Equal Partners,” tenniet Mifsud.
L-Equal Partners toffri s-servizzi tagħha grazzi għal donazzjonijiet, attivitajiet li torganizza kif ukoll il-5,000 siegħa b’xejn ta’ volontarjat li tirċievi kull sena mill-professjonisti li jaħdmu magħha.
“Kull sena l-Fondazzjoni tagħti sponsor ta’ 20 fil-mija tal-programmi li jirċievu l-partners tagħna. F’dawn l-aħħar tmien snin il-Fondazzjoni qassmet madwar Lm55,000 f’servizzi b’xejn lill-membri tagħha,” tgħid Annabel Mifsud.
Din il-gazzetta għandha kopja tat-talbiet kollha li għamlet l-Equal Partners fosthom lill-Prim Ministru Eddie Fenech Adami, lill-Prim Ministru Lawrence Gonzi, lis-Segretarju Parlamentari Tonio Fenech, lill-Ministru Louis Galea, lill-Ministru Dolores Cristina, lill-Kummissarju tat-tfal Sonia Camilleri u lill-Kummissjoni Nazzjonali għall-Persuni b’Diżabbiltà.