L-Irlandiżi jwaqqgħu l-każ kontra iben Muscat

Kurt Sansone
Il-pulizija Irlandiża ddeċidiet li twaqqa’ l-każ kontra iben l-eks ambaxxtur Malti Richard Muscat wara li ma sabitx biżżejjed provi fil-konfront tiegħu.
Wara li ra l-file tal-każ, il-Prosekutur Pubbliku ddeċieda li m’għandhomx jittieħdu passi kontra Massimo Muscat.
Fi stqarrija tard ilbieraħ filgħaxija, l-eks ambaxxatur qal li l-familja tiegħu tinsab kuntenta u “meħlusin” bid-deċiżjoni li ħa d-Direttur tal-Prosekuzzjoni Pubblika.
Id-deċiżjoni tal-Prosekutur Pubbliku ntbagħtet lis-Supretendent tal-Pulizija ta’ Donnybrook, Dublin.
“Din id-deċiżjoni ħelset lill-ibni minn kull żball u għalqet b’mod pożittiv xhur ta’ nkwiet u pressjoni qawwija fuq ibni, fuqi personalment u fuq il-familja. Ninsabu sodisfatti li din l-esperjenza nġusta u sfortunata issa ġiet iċċarata,” sostna Muscat.
Studenta Irlandiża kienet allegat li iben Muscat kien attakkaha sesswalment tard is-sena li għaddiet. Il-każ inkixef fil-pubbliku minn gazzetta Irlandiża wara li t-tfajla ddeċidiet li titkellem għax il-pulizija baqgħu ma ħadux passi fuq l-akkużi tagħha.
L-attenzjoni li ngħatat mill-media Irlandiża u dik Maltija dwar il-każ wasslet biex Muscat joffri r-riżenja tiegħu minn ambaxxatur liema riżenja kienet aċċettata mill-Gvern Malti.
Il-Ministru ta’ l-Affarijiet Barranin Michael Frendo kien stqarr li l-ewwel darba li sema’ bil-każ kien meta ħareġ fil-media, xhur wara li l-pulizija Irlandiża rċeviet ir-rapport ta’ l-istudenta.