L-Akkademja tal-Malti: x’kienet u x’se ssir

Franica Pulis iltaqgħet mal-President il-ġdid u dak ta’ qablu u staqsiethom dwar id-direzzjoni li għandha tieħu l-Akkademja

Il-ġimgħa li għaddiet inħatar il-kunsill il-ġdid ta’ l-Akkademja tal-Malti u miegħu nħatar President ġdid. L-eks President Marco Galea ma reġax ikkontesta għall-kariga għax xtaq jaħdem aktar għar-riċerka u għall-kitba.
“Meta ħadt din id-deċiżjoni ma ridtx li nibqa’ fil-Kunsill biex il-President il-ġdid ikun ħieles li jagħti d-direzzjoni li jixtieq hu mingħajr ma jkun hemm min ifakkru li l-affarijiet kienu jsiru mod ieħor jew xi ħaġ’hekk,” sostna Galea ma’ Illum.
Il-President il-ġdid Anton Agius Muscat, fl-ewwel kummenti tiegħu ma’ din il-gazzetta qal li l-eks president minkejja li rtira, xorta “għandu f’idejh l-inkarigu li jkompli jiġbor tagħrif li jista’ jorbot ma’ l-affiljazzjoni ta’ l-Akkademja mal-European Writers’ Congress, federazzjoni ta’ 57 għaqda fi 30 pajjiż fl-Ewropa.”
Jidher li l-bidla fl-Akkademja mhux se tbiddel b’mod radikali d-direzzjoni li qabdet f’dawn l-aħħar sentejn.
Kemm il-President u l-eks President jaħsbu li l-kunsill hu wieħed tajjeb, jew kif sejjaħlu Agius Muscat, “f’waqtu”. Il-kunsill għas-sentejn li ġej magħmul minn tliet membri ġodda, sitta oħra li baqgħu fl-istess rwol u tnejn li kienu membri u nbidel ir-rwol tagħhom.
“Hemm taħlita tajba ta’ kittieba, għalliema u studjużi li kollha huma dedikati għax-xogħol ta’ l-Akkademja u għandhom ukoll viżjoni professjonali ta’ dak li hemm bżonn biex il-kittieba Maltin u l-istudju tal-Malti jimxu ’l quddiem. Nawguralhom li l-proġetti li għandhom quddiemhom jirnexxu,” qal Galea.
L-eks President meta mistoqsi x’ra li mar tajjeb u ħażin fis-sentejn tiegħu wieġeb li l-aktar ħaġa li hu kburi biha li ma kien hemm l-ebda inkwiet fl-Akkademja.
“Il-pubbliku kien imdorri jisma’ li l-kittieba ta’ l-Akkademja tgħidx kemm tgħajru, li ġew fl-idejn, li qatlu ’l xulxin. F’dawn is-sentejn ħadd ma weġġa’ f’laqgħa tal-Kunsill. Qatt ma rċevejna ittri ta’ theddid. Kellna Laqgħa Ġenerali trankwilla daqs festin tas-sorijiet. U f’din it-trankwillità rnexxielna nagħmlu ħafna affarijiet. Għamilna żewġ ħarġiet tajbin ta’ Il-Malti, minbarra ħarġa speċjali. Organizzajna numru ta’ taħditiet li jinteressaw lill-kittieba, lill-istudenti, u lil min hu marbut ma’ l-istudji Maltin,” qal Galea li semma wkoll is-seminars li saru min-naħa tal-Kunsill u l-ħidma tajba li kellhom ma’ entitajiet oħra fosthom il-Ministeri ta’ l-Edukazzjoni u għal Għawdex, il-Kunsill Nazzjonali ta’ l-Ilsien Malti u d-Dipartiment tal-Malti ta’ l-Università.
Agius Muscat semma wkoll l-problemi li kienu nqalgħu fil-Kunsill u tenna li parti minn xogħlu hu li jekk jerġgħu jinqalgħu xi ntoppi jieħu ħsiebhom kif xieraq.
“Hu minnu li xi sitt snin ilu l-Akkademja ltaqgħet ma’ skoll u nqala’ nuqqas ikrah ta’ ftehim. Madankollu llum raqad kollox. Hekk jew b’hekk dmiri llum hu li nħarsu ’l quddiem għall-ġid ta’ kulħadd. Jekk jinqala’ xi saram ġdid nieħu ħsiebu kif jixraq,” tenna l-President.
Galea semma wkoll xi diżappunti jew affarijiet li xtaq jimxu aktar ’il quddiem fiż-żmien il-kariga tiegħu. Fosthom semma nuqqas ta’ attendenza min-nies f’uħud mill-attivitajiet tagħhom u l-uffiċċju li ngħataw mill-Ministeru ta’ l-Edukazzjoni sentejn ilu u li sakemm kien għadu President hu ma setax jintuża.
Hu jispera li l-Kunsill il-ġdid ikollu aktar ċans jaħdem fuqu u li b’aktar fondi l-Akkademja jkollha l-uffiċċju li jixirqilha. Minbarra dan jemmen l-Akkademja għandha “terġa’ tmur lura lejn l-għeruq u taħdem biex iġġib ’il quddiem l-interessi tal-kittieba Maltin kif ukoll tibda titmexxa b’mod professjonali biex tkompli timxi ’l quddiem, minkejja li diġà tinsab f’idejn tajba.
“S’issa kienet ftit jew wisq għaqda volontarja, minkejja l-istatus tagħha fil-liġijiet u l-bqija. Imma biex tibqa’ relevanti għandha bżonn amministraturi li jkunu impjegati u li joffru servizz lill-komunità tal-kittieba u lill-pubbliku Malti,” sostna Galea.
Bħala għanijiet għall-Kunsill il-ġdid Agius Muscat semma li titkompla l-ħidma fejn tħalliet mill-Kunsill ta’ qabilha. Fil-fatt diġà qed taħdem fuq il-ħarġa li jmiss ta’ Il-Malti. Se tibqa’ wkoll taħdem mal-Kunsill Nazzjonali ta’ l-Ilsien Malti.
Għanijiet ġodda huma t-titjib ta’ l-eżami tal-MATSEC u li l-istudenti joħorġu mill-iskola jafu jiktbu u jaqraw sew bil-Malti. Minbarra dawn trid taħdem aktar għall-kittieb Malti.
“Matul snin sħaħ l-awtur Malti ħass ruħu waħdu hu u jara kif l-aħjar jippubblika l-kitba tiegħu. Fuq mozzjoni tiegħi sentejn ilu l-Akkademja bdiet tiġbor tagħrif li jolqot l-awtur u l-pubblikatur Malti. Jeħtieġ rappreżentanza organika u infurmata.
“Nittama li ta’ l-inqas nibdew l-ewwel passi f’sens kollettiv billi jinġabar tagħrif meħtieġ b’riżq l-awtur u l-pubblikatur Malti għall-ġid tal-prodott intelletwali Malti,” kompla jgħid il-President attwali.