Pressjoni biex issir f’Diċembru

Kurt Sansone
Il-Prim Ministru Lawrence Gonzi għandu pressjoni minn uħud fil-Partit Nazzjonalista biex isejjaħ l-elezzjoni qabel tmiem is-sena biex il-partit ikun jista’ jirkeb fuq l-effett pożittiv tal-baġit u fl-istess ħin jevita l-problemi marbuta mad-dħul ta’ l-ewro f’Jannar.
Minkejja dan jidher li Gonzi mhux probabbli li jċedi għal din il-pressjoni u indikazzjoni ta’ dan taha fil-Parlament din il-ġimgħa meta sostna li l-amministrazzjoni tiegħu għad fadlilha xi xhur oħra.
Hu sigriet magħruf li Gonzi għandu x-xewqa li jitniżżel fl-istorja bħala l-Prim Ministru li daħħal lil Malta fiż-żona ewro wara erba’ snin ta’ ħidma iebsa.
Id-diskussjoni dwar il-baġit fil-Parlament mistennija tingħalaq fit-2 ta’ Novembru u dan jippermetti lill-Prim Ministru biex isejjaħ l-elezzjoni għat-8 ta’ Diċembru.
L-aħħar darba li l-elezzjoni saret f’Diċembru kien fl-1981 meta Mintoff sejjaħha għal lejlet ir-Repubblika fit-12 tax-xahar.
Għalkemm Gonzi mhux obbligat li bilfors irid jagħlaq id-diskussjoni dwar il-baġit qabel ma jsejjaħ elezzjoni, qajla jagħmel sens għalih li ma jistenniex l-aħħar vot fuq baġit li se jħalli iktar flus fil-bwiet tan-nies.