Min qal li l-pensjonanti huma sinjuri żgħar?

Minn Albert J Tabone,
San Ġiljan

Fl-ittra Id iebsa u s-solidarjetà li dehret fl-Illum fl-14 ta’ Ottubru Roev Zahra semma li persuna minn naħa tal-Gvern qaltlu li jekk l-anzjani “joqgħodu attenti, mill-pensjoni jibqgħalhom minfejn ifaddlu u jsiefru.”
Min qal dan id-diskors bilfors jew xi Ministru jew eks Ministru jew xi ħadd midħla sew tagħhom. Dawk biss li kienu ministri għandhom pensjoni li, tirtira meta tirtira, tibqa’ dejjem żewġ terzi tal-paga kurrenti.
Dak li llum għandu pensjoni ta’ Lm193 fil-ġimgħa, apparti minn ta’ l-inqas Lm38 fil-ġimgħa oħra pensjoni tas-Siġurtà Soċjali, żġur mhux kapaċi jara l-problemi ta’ dawk l-eluf kbar ta’ pensjonanti li jridu jkampaw b’inqas minn Lm50 fil-ġimgħa.
Lil dawk kollha li jaħsbu li l-pensjonanti fil-parti l-kbira tagħhom huma sinjuri żgħar ngħidilhom get real!