Il-Bomba u l-Banana

Julia Farrugia
jfarrugia@mediatoday.com.mt

Il-programm ‘Bomba’ fuq ix-xandir ta’ l-istat irnexxielu joħloq ‘splużjoni’ fil-kurituri tal-PBS. Id-DJ lokali ‘Il-Banana’ qed jhedded li se jiftaħ kawża kontra l-PBS u kontra l-attur Ray Calleja. Illum hi nfurmata li fl-aħħar jiem spiċċaw daħlu f’din il-kwistjoni l-Pulizija wara li dawn irċevew rapport mid-diriġenti tal-PBS li DJ Banana heddidhom.
Il-każ hu marbut mal-karattru ġdid ‘DJ Banana and the Coconuts’ li jinterpreta l-attur Ray Calleja waqt il-programm Bomba. Dan id-‘DJ’ suppost ixandar mill-RTK u bi stil differenti jipprova jwassal bosta messaġġi.
Iżda l-karattru tad-DJ bil-Coconuts xejn ma niżel sew ma’ DJ Banana ta’ veru, tant li dan ċempel il-PBS biex jipprotesta kontra l-programm ‘Bomba’u l-mod kif qed iwaqqgħuh għaċ-ċajt.
Allegatament waqt it-telefonata DJ Banana kien rappurtat jgħid li “se jaqla’ waħda kbira, se jkisser kull m’hemm u li jekk il-karattru tad-DJ fil-programm mhux se jieqaf l-affarijiet se jispiċċaw ħażin.”
Wara li l-PBS ħadu parir legali dawn kienu mitluba jagħmlu rapport lill-Pulizija, rapport li sar fl-għassa tal-Ħamrun. Jirriżulta li Spettur mill-istess għassa kellem lil DJ Banana dwar dan il-każ.
Din il-gazzetta għandha f’idejha kopja ta’ żewġ emails li rċieva l-PBS minn DJ Banana wara l-ewwel telefonata tiegħu. L-emails intbagħtu fost l-oħrajn lill-Kap Eżekuttiv ta’ l-istazzjon Albert Debono.
F’waħda mill-emails DJ Banana jgħid li meta ċempel il-PBS biex jagħmel l-ilment tiegħu wieħed mill-impjegati “kien veru arroganti. Forsi dan hu l-mod kif dan ir-raġel kien jittratta lill-barranin meta kien jgħix barra. Imma Malta mhux hekk, għax jien personalment se nagħmel mezz biex il-Maltin ikunu jafu min il-PBS qed jimpjega fi flus il-poplu.”
Fl-email id-DJ Malti jimplika wkoll li martu tilfet tarbija minħabba dan l-inkwiet li nqala’ wara li ħafna persuni spiċċaw iċemplulhom id-dar wara li raw il-programm. Fl-email DJ Banana jiddeskrivi l-programm ‘Bomba’ bħala żibel, “rubbish.”
Ikkuntattjat minn din il-gazzetta DJ Banana sostna li hu qatt ma’ għamel ħsara lil ħadd u ippretenda li l-PBS u l-attur Ray Calleja kellhom jitolbuh permess qabel ma’ użaw ismu biex joħolqu karattru televiżiv minnu.
“Jien bniedem li ċ-ċajt nieklu. Inħobb niċċajta, inkluż dwari stess, imma ma nħobbx inwaqqa’ għaċ-ċajt lil persuni oħra,” sostna l-Banana.
Mistoqsi jekk hux minnu li wara dan l-inċident attakka personalment lil Ray Calleja b’temi differenti, fosthom marbuta ma’ l-omosesswalità, il-preżentatur ammetta u qal li “veru li għidt ċertu diskors on air fil-programm tiegħi fuq Smash Radio. Imma għandi dritt nuża l-mezzi li għandi wara li ġejt imżeblaħ b’dan il-mod minn ħaddieħor.”
Mitlub jikkummenta x’dejqu dwar il-karattru DJ Banana and the Coconuts, il-preżentatur wieġeb” “fil-ħajja normali tiegħi qatt ma nilbes ħwejjeġ imqatta’, xagħri folt hu tiegħi u hu reali, wiċċi mhux veru tawwali bil-mod esaġerat li pinġewni, u qatt ma noqgħod naqbad il-parti tiegħi fil-pubbliku.
“Ili 26 sena nibni r-reputazzjoni tiegħi u mhux sew li nitwaqqa’ għar-redikolu b’dan il-mod,” kompla d-DJ.
Il-Banana saħaq li dan il-programm ħoloqlu problemi kbar tant li n-nies spiċċaw idejqu lill-familja tiegħu anke d-dar.
“Kelli nneħħi żewġ linji telefoniċi. Il-mara u jien tlifna tarbija minħabba dan l-inkwiet żejjed,” sostna r-raġel.
Din il-gazzetta hi nfurmata li nhar il-Ħamis fil-PBS saret laqgħa ma’avukat biex l-istazzjon ta’ l-istat u l-produzzjoni tal-programm ‘Bomba’ jieħdu parir dwar jekk hux se jkomplu l-karattru tad-DJ u l-Coconuts. Id-deċiżjoni kienet li l-karattru jitkompla.
DJ Banana sostna ma’ Illum li “jekk il-karattru ‘tiegħu’ se jkompli se tkun bi kbira. Niftaħ kawża l-Qorti u kulħadd ipattiha mill-familja tiegħi.”
Mitlub minn din il-gazzetta biex jikkummenta dwar dan il-każ l-attur Ray Calleja sostna li “f’dawn it-tip ta’ sitwazzjonijiet żgur li qatt ma jkollna l-intenzjoni li nweġġgħu lil xi ħadd. Kulmin b’xi mod jixbaħ lill-karattri ta’ veri hu għaliex jien nammirahom personalment.”