L-AD tapplika għal stazzjon tat-televiżjoni

Charlot Zahra

Alternattiva Demokratika se tingħaqad mal-partiti l-kbar meta ħabbret li kienet applikat għal liċenzja biex tħaddem stazzjon tat-televiżjoni fuq il-“cable” ftit tax-xhur biss qabel tissejjaħ elezzjoni ġenerali.
Meta kien qed jitkellem waqt konferenza ta’ l-aħbarijiet barra l-uffiċini ta’ l-Awtorità tax-Xandir il-bieraħ, Harry Vassallo, iċ-Chairperson ta’ l-AD, qal li l-applikazzjoni għal stazzjon tat-televiżjoni kienet tressqet ftit tal-ġimgħat ilu.
Min-naħa tagħha l-Awtorità tax-Xandir wiegħdet lill-AD li kienet se toħroġ “letter of intent” għall-ħruġ tal-liċenzja tax-xandir bit-televiżjoni malli l-partit jgħaddi t-tagħrif kollu mitlub fl-applikazzjoni. Vassallo qal li l-AD mhix se tindaħal fit-tmexxija ta’ kuljum ta’ l-istazzjon u għaldaqstant kienet se toħroġ sejħa għall-offerti għat-tmexxija tiegħu.
Is-sejħa għall-offerti, li se toħroġ nhar it-Tnejn u tagħlaq 15-il jum wara, tinkludi ukoll il-provvista ta’ l-apparat tekniku kollu meħtieġ għall-produzzjoni u x-xandir ta’ l-istazzjon kif ukoll il-provvista tal-programmi, inkluż l-aħbarijiet u programmi ta’ ġrajjiet kurrenti.
Fl-istess waqt Vassallo tenna l-pożizzjoni ta’ l-AD li tkun lesta li tagħlaq l-istazzjon tat-televiżjoni “jekk il-Partit Laburista u l-Partit Nazzjonalista jagħlqu l-istazzjonijiet rispettivi tagħhom ukoll”.