Id-divorzju u r-referendum

Minn Kevin Tanti,
Santa Venera

F’din il-gazzetta l-Ħadd li għadda kien hemm artiklu li tani indikazzjoni li l-partiti politiċi Maltin jaqblu li jagħmlu referendum dwar l-introduzzjoni tad-divorzju.
Dan żball għax bniedem li ż-żwieġ tiegħu sejjer tajjeb m’għandux bżonn l-introduzzjoni tad-divorzju u għalhekk jista’ jiġi jaqa’ u jqum minn min ma kellux żwieġ tajjeb u qed ibati.
Aktar minn hekk il-Knisja Kattolika żgur li tagħmel effett fuq il-vot tan-nies. Għalhekk nemmen li d-divorzju għandu jiddaħħal ħalli min kien xortih ħażina u jixtieq jerġa’ jipprova xortih ikollu dan iċ-ċans. B’referendum żgur li l-interess tal-persuni fil-bżonn tad-divorzju ma jkunx imħares għax il-maġġoranza ma jaqblux għax m’għandhomx interess.
Għalhekk minn qalbi nħeġġeġ lill-partiti kollha biex ikollhom il-kuraġġ u jieħdu deċiżjoni fl-interess tal-minoranza.