Grazzi lil Dun Daniel Xerri

Minn Noel Formosa,
Sindku,
San Lawrenz
 
Xi ġranet ilu l-komunità tagħna rċeviet l-aħbar li l-Kappillan Daniel Xerri, wara biss tliet snin jaqdi l-missjoni pastorali fostna, issejjaħ mill-Isqof biex jaqdi missjoni oħra, dik tal-formazzjoni tas-seminaristi bħala rettur.
Hi missjoni importanti ħafna għall-Knisja f'Għawdex. M’għandi l-ebda dubju li Dun Daniel se jkun tassew għodda tajba f'idejn il-Mulej kif kien fostna. Inwiegħed minn hawn lill-Kappillan it-talb u s-sosten tagħna bħala komunità f'din il-missjoni l-ġdida.
Għalina ta' San Lawrenz dan il-mument hu mument diffiċli ħafna. Inħossuna li tlifna l-missier spiritwali tagħna. Iżda l-Kappillan, għalkemm fi żmien qasir, għallimna biex f'kull sitwazzjoni fil-ħajja naraw l-id t'Alla.
Għallimna kif inħallu lil Alla jmexxi hu lill-ħajja tagħna.
Fid-dawl ta' din il-formazzjoni l-kelma tagħna hi waħda: grazzi Mulej talli tajtna dan il-ġid kollu u noffruh lil Alla biex id-Djoċesi tagħna tgawdi wkoll minn dan il-frott.
In-nuqqas tiegħu se jinħass iżda l-eżempju u t-tagħlim tiegħu se jibqgħu wkoll f'moħħna u f'qalbna.