Aħbarijiet | 05 ta’ Awissu 2007 • Nr 40

L-ebda żblokk fit-tilwima industrijali fl-isptarijiet

Charlot Zahra
czahra@mediatoday.com.mt

Jidher li ma kien hemm l-ebda żblokk fit-tilwima industrijali bejn il-General Workers’ Union (GWU) u d-Diviżjoni tas-Saħħa hekk kif l-azzjonijiet industrijali ordnati mill-Union illum daħlu fit-tielet jum tagħhom.
Il-Ministru tas-Saħħa Louis Deguara qal lil din il-gazzetta li sal-bieraħ filgħaxija ma kien hemm l-ebda żvilupp bejn iż-żewġ naħat u li s-sitwazzjoni “għadha kif kienet”.
Hu fisser li l-azzjonijiet qed jolqtu l-aktar lill-pazjenti li jkunu fis-sodda għax, fost l-oħrajn, in-nursing aides mhumiex qed jaħsluhom.
“Ix-xogħol li kien isir min-nursing aides qed isir min-nurses li b’hekk qed ikollhom jagħmlu aktar xogħol,” qal Deguara.
Nhar il-Ġimgħa il-GWU ordnat lin-nursing aides, il-health assistants u l-care workers biex jagħmlu biss xogħol ta’ tqassim ta’ ikel lill-pazjenti. Ix-xogħol tagħhom is-soltu jinkludi il-ħasil tal-pazjenti, li jqajmuhom mis-sodda u l-bdil tal-ħrieqi tal-pazjenti inkontinenti.
Dawn l-azzjonijet l-aktar li qed jolqtu lill-pazjenti li ma jistgħux jieħdu ħsieb tagħhom infushom b’mod indipendenti għax huma fiżikament jew mentalment inkapaċi li jagħmlu dan.
Fost dawn hemm aktar minn 1,000 pazjent fir-Residenza San Vinċenz de Paule, aktar minn 300 pazjent fl-Isptar Monte Karmeli u l-kważi 100 pazjent fl-Isptar Pawlu Boffa.
Il-GWU ordnat dawn l-azzjonijiet industrijali wara li kien hemm nuqqas ta’ qbil mad-Diviżjoni tas-Saħħa dwar tliet kwistjonijiet: it-talba tagħha sabiex in-nursing aides jitqiegħdu fi Skala 13, ir-roster u li n-nursing aides u l-health assistants jingħataw ħlas addizzjonali ta’ Lm195 fis-sena imsejjaħ premium allowance.
Is-Segretarju Ġenerali tal-GWU Tony Zarb ilmenta li d-diskussjonijiet dwar dawn il-kwistjonijiet ilhom is-snin għaddejjin.
“Il-Gvern minflok sejjaħ konferenza ta’ l-aħbarjiet imissu uża dak il-ħin biex jipprova jsib soluzzjoni għall-kwistjoni. Il-General Workers’ Union hija lesta għad-diskussjonijiet. Nistennew li l-Gvern min-naħa tiegħu juri rieda tajba u jiġi fuq il-mejda tan-negozjati,” Zarb qal lil din il-gazzetta.
Mistoqsi għall-opinjoni tiegħu dwar din it-tilwima industrijali, l-eks Deputat Segretarju Ġenerali tal-GWU Manwel Micallef qal li sitwazzjoni bħal din fejn hemm azzjoni industrijali ġo sptar hi delikata għax taffettwa l-pazjenti. Huwa fakkar li l-liġi tax-xogħol tesiġi li s-servizzi ta’ emerġenza ma jkunux affettwati. 
“Ħafna drabi iż-żewġ naħat ikunu bdew jinnegozjaw u kulħadd żamm il-pożizzjoni tiegħu u għalhekk ikunu marru għall-azzjonijiet industrijali. Ikun tajjeb li jidħol medjatur biex iħoll il-kwistjoni,” qal Micallef.
Intant il-Kelliem Laburista għas-Saħħa Michael Farrugia ma riedx jikkummenta għax ma kienx involut fit-taħdidiet. “Fid-diskussjonijiet bejn iż-żewġ naħat hemm affarijiet li ma nkunux nafu bihom, allura ma nistax nikkummenta. Inkun prużuntuż li nikkummenta,” sostna Farrugia.